37-inik ukiulimmut eqqartuussinerup ullup pingajussaa ullumi pingasunngornermi aallartippoq. Angut ilaatigut kinguaassiuutitigut kannguttaatsuliorsimasutut meeqqanillu tiingalersaarutinik tigummiarsimasutut unnerluutigineqarpoq.
Eqqartuussivilersuussineq aallartilerpat unnerluutigineqartoq politiimit eqqunneqarpoq. Unnerluutigineqartoq qernertunik atisaqarpoq eqqissisimalluni, qasoqqarpasipporli.
37-inik ukiulimmut eqqartuussinerup ullup pingajussaa ullumi pingasunngornermi aallartippoq. Angut ilaatigut kinguaassiuutitigut kannguttaatsuliorsimasutut meeqqanillu tiingalersaarutinik tigummiarsimasutut unnerluutigineqarpoq.
Eqqartuussivilersuussineq aallartilerpat unnerluutigineqartoq politiimit eqqunneqarpoq. Unnerluutigineqartoq qernertunik atisaqarpoq eqqissisimalluni, qasoqqarpasipporli.
Immikkoortut pillugit paasissutissat
Angut 37-inik ukiulik qarasaasiamini 18-it inorlugit ukiullit kinguaassiuutitigut tunngasut 2.344-it assit aamma 17.770-it immiussat pigisarisimagamigit unnerluutigineqarpoq.
Immikkoortoq 1 tassaavoq meeqqanik atoqatiginnippalaartunik atisaqanngitsunik assit immiussallu.
Tassani assit 1.530-it immiussallu 3.931-it tigummineqarsimapput.
Immikkoortoq 2 tassaavoq assit immiussallu inersimasut meeqqanik atoqateqarnerannik imaqartut.
Tassaniipput assit 730-it immiussallu 13.376-it.
Immikkoortoq 3 tassaavoq assit immiussallu meeqqanik uumasunillu naalliutsitsilluni atornerluinerit.
Tassaniipput assit 84-it immiussallu 463-it.
Immiussat ulluni 41-ini, akunnerni 12-ini, minutsini 22-ini kiisalu sekundini 36-ini sivisussuseqarput.
Unnerluutigineqartut nerriviannut ingippoq.
Eqqartuussinerup aallartisimalaarnerani unnerluutigineqartup illersuisuata illersukkami unnerluussutinut ataasiakkaanut nassuernersoq pisuunnginnerarnersorlu saqqummiuppaa.
Nukappiaraq atoqatigisimallugu nassuertoq
Illersuisoq naapertorlugu unnerluutigineqartoq pisunut arlalinnut nassuerpoq, ilaatigut ukiukitsumik atoqateqarsimasutut aamma meeqqat inuusuttuaqqallu 18-it ataallugit ukiulinnik tiingalersaarutinik tigummiaqarsimanerarluni nassuerpoq.
Pisimasunili arlalinni kannguttaatsuliorsimasutut eqqissinermillu akornusiisimasutut pisuunnginnerarpoq.
Unnerluutigineqartoq aamma akiliilluni atoqateqateqarsimannginnerarpoq.
Unnerluussutit Sermitsiap pissarsiarisimasaani atuarneqarsinnaavoq pisimasut arfinilli assigiiaartuusut, tassani Sisimiuni unnerluutigineqartup najugaani qaammatit tallimat iluanni, tassa 2023-ip 2024-llu akornanni nukappiaraq 17-inik ukiulik akiliilluni atoqatigisimagaa.
Unnerluussummi aamma allassimavoq pisimasut taakku isertortumik filmiliarineqarsimasut, unnerluussisussaatitaasut naapertorlugit nukappiaraq kannguttaatsuliorfigineqarsimavoq. Unnerluutigineqartorli pisimasuni taakkunani arfinilinni kannguttaatsuliormannginnerarpoq eqqissinermillu akornusiisimannginnerarluni.
Ernumanermik allagaqaat
Pingasunngornermi eqqartuussinermi arnaq Sisimiuni ulloq unnuarlu angerlarsimaffimmi aqutsisuusoq nassuiaasinneqarluni sassartinneqarpoq.
Taassuma eqqartuussivimmut nassuiaatigaa nukappiaraq angummit sulisunit ilisimaneqartumit - maanna eqqartuussaasumit - angerlaanneqarluni biiliunneqartarmat sulisut ernumalersimasut.
Sulisut ilisimammassuk angut kannguttaatsuliorsimasutut eqqartuussaanikuusoq.
Ulloq unnuarlu angerlarsimaffik taamaattumik unnerluutigineqartumut politiinullu ernumaammik allagaqaasiorsimapput. Piffissallu sivikitsup ingerlanerani angut politiinit tigusarineqarpoq.
Arnaq eqqartuussivimmi nassuiaasinneqareermat unnerluutigineqartoq ima nassuiaavoq:
- Allagaq allakkanik nakkartitsivimmeersoq atuarakku tupappunga, taamaattumik nukappiaraq allaffigaara mianersortariaqartugut takusarunnaartariaqartugullu.
Pinerlineqartut eqqartuussivimmi nassuiaasinneqartussaammata eqqartuussineq ullup sinneranut matuneqarpoq. Eqqartuussineq sisamanngornermi maajip ulluisa 15-anni nangeqqissaaq, naatsorsuutigineqarluni eqqartuussineq naammassissasoq.
