Kim Kielsenip Erik Jensenip namminiilivinnissamik pilersaarutaa unammillerpaa

Siumumi siulittaasuusimasup Kim Kielsenip (S) kalaallit politikerii sukkasuumik naalagaaffinngortitsinissamik anguniagaqarpallaartut isumakuluutigaa.

– Inuit ilaat isumaqarput taamatut oqariartuuteqarneq Kalaallit Nunaannut iluaqutaasoq. Kalaallit Nunaannut suut pitsaanerpaanersut oqaatiginissaa pingaaruteqartorujussuusoq isumaqarpunga, Kim Kielsen DR-imit apersorneqarluni oqarpoq.

Qineqqusaarnerup aallartinnerni Siumumi siulittaasup Erik Jensenip qinersisoqareerpat namminersorneq pillugu inatsimmi paragraf 21 atuutilersinneqassasoq oqaatigaa. Tassa namminiilivinnissaq pillugu danskit naalakkersuisuinik isumaqatiginninniartoqalissasoq.

Kim Kielsenip partiimi siulittaasutut tullini tamanna pillugu tapersersornagu oqaatigaa:

- Siullermeerlunga partiip siulittaasua akerlerinngilara, ataatsimeersuarnermili partiip politikkia aalajangiunneqartoq tapersersorpara. Taanna tunngavigalugu sulivunga, oqarpoq.

Erik Jensen DR-imit apersorneqarumanini kingorna itigartitsissutigaa. Partiimi avissaartuuttoqanngitsoq allakkatigut paasissutissiissutigaa.