KNI A/S-ip amigartoorutit mumisikkusuppai – sivikinnermik ammasalerlunilu nioqqutissakinnerulissasoq
KNI A/S ukiuni arlalinni sinneqartoortareerluni maanna amigartooruteqarpoq. 2024-2025-mut naatsorsuutit 75 millionit koruuninik amigartooruteqarfiummata suliffeqarfissuaq allannguisariaqarpoq. Illoqarfinnut nutserneq, mittarfiit nutaat, attaveqaatit allanngornerat aamma poortukkat pillugit nalunaarut aqutsisut naapertorlugit aningaasaqarnermut tatisissutaasunut ilaapput.
Assi: KNI A/S
Innuttasut suli amerlanerusut nunaqarfimmiit illoqarfinnut nutserput - mittarfittaat pissutigalugit.
Kangerlussuarmi innuttaasut pisiniarfinnut niuertarsimasut, maanna Nuummi pisiniarfinni niuertarput.
Aamma eqqaamassajunnarsisarput tamatta, Nuuk Imeq matunikuuvoq. Nuummi mittarfissuaq ammaqqammerpoq, innuttaasullu Kangerlussuarmiit Nuummut nutserput. Inuiaqatigiinni allannguuterujussuit KNI A/S-mut sunniuteqarput.
Sermitsiaq KNI A/S-ip allaffeqarfianut pulaarpoq, tassami sinneqartoorutit mumisinneqassappata qanoq pilersaaruteqarnersut paasiniarlugu.
Pisortaaneq, Jeppe Jensen allaffimmini issiavoq ulapeqaluni. Apersorneqarnissamulli piffissaqarpoq.
- Allanngutit annertuut, soorlu poortuutit pillugit nalunaarutip atuutilersinneqarnera, mittarfiit nutaat illoqarfinnullu nutsernerit KNI-mut sunniuteqarput, Jeppe Jensen oqarpoq.
Pisiortorfiit neqeroorutigineqartut
Suliniutit ilaat tassaapput pisiortornermi assartuinermillu pitsanngorsaaneq, tassa pisiortorfiit ikilisarnissaat.
– Pingaarnertut pisiortorfipput suliariumannittussarsiuupparput. Pisiarisartakkatta 75 procentii pisisarfitsinnut aalajangersimasumut pisiarisarpavut. Isumaqatigiissut taanna suliariumannittussarsiuupparput niuerneq misissorniarlugu, pitsaanerulersitsisinnaanerlutalu paasiniarlugu – pilersuisorput imaluunniit pilersuisut nutaat soqutiginnittut, Jeppe Jensen oqarpoq.
Tamannami pisiniartartunut qanoq malugineqarsinnaassava?
- Atuisut allannguutit malugisinnaavaat, qanorli iliussanerluta oqaatigissallugu suli siusippallaarpoq. Maannakkut oqaatigisinnaasatta ilaat tassaavoq nioqqutissaq ataaseq assigiinngitsorpassuarnit sananeqartartut ikilisarneqassapput. Pisisartuniit pisiarineqarpiarneq ajortut.
- Errorsinermut qaqorsaatit assersuutigisinnaavakka: Ullumikkut errorsinermut qaqorsaatit Neutralit assigiinngitsut sisamat pigaagut, massakkulli ataasiinnanngorlugit ikilisarniarpagut. Aamma soorlu assigiinngitsunik pingasunik remouladenik pisiassaateqarpugut, nalunngilarpulli taakkunani ataasiinnaq pisiarineqarnerusartoq. Immikkoortitsikkat ikilisassavagut, pisiarineqarnerpaat kisimik pisiassaatigilissallugit.
Namminersorlutik Oqartussanik kiffartuussinissamut isumaqatigiissut naapertorlugu pisiniarfiit assigiinngitsut 150-it 350-illu akornanni nioqqutissaqartarput, ullumikkulli KNI-p pisiniarfiini nioqqutissat amerlanerungaarput — amerlanertigut nioqqutissanik assigiinngitsunik 1000-init amerlanerusunik.
Ammasarfiit nutaat
Ammasarfiit aamma allanngortinneqassapput. Septembarip aallaqqaataanii Pilersuisumi pisiniarfiit nutaanik ammasarfittaassapput.
- Pisiniarfinni ammasarfiit 12%-inik ammanikinnerulersissavagut. Naleqqussassaagut, taava pisiniartartut pisiniarnerpaasarfianni ammasarluta. Niuertarfimmut isumaqassaaq, Jeppe Jensen oqarpoq.
Soraarsitsisoqassanngilaq
Amigartooruteqarneq sulisunut qanoq kinguneqassava? Pisortaaneq naapertorlugu soraarsitsiortornissamut pilersaaruteqartoqanngilaq.
- Naamik, taanna aqqut isiginngilarput. Assersuutigalugu sulisunik aalajangersimasunik soraarsitsinngilagut. Tiimimusiaqartunilli sulisoqarneq allanngortissavarput, ikilisarlugit. Sulisut soraaraangata sulisussarsiornata, suliassat sulisooreersunut agguartassavagut. Soraarsitsiortornata taamaaliussaagit.
Aappaagu sinneqartooruteqarniartut
KNI A/S qaqugu sinneqartooruteqassanersoq maanna apeqqutaaginnalerpoq.
- Aappaaguarannguaq. Aappaagu 50 millionit koruuninik sinneqartooruteqarnissaq naatsorsuutigaarput, aamma sulissutigeqaarput. Aningaasaqarnerput qanimut malinnaaffigilluaqqissaassavarput, Jeppe Jensen neriorsuivoq.
