KNI-mi peqquserluttoqarneranut suliaq Nunatta Eqqartuussisuuneqarfiani maanna suliarineqarpoq
Eqqartuussisoqarfimmi peqquserluttutut allagaatinillu eqqunngitsuliortutut pisuutinneqarpoq. KNI-mili naatsorsuuserisuusimasoq pinngitsuutinneqarusuppoq, maannalu suliaq Nunatta Eqqartuussisuuneqarfiani suliarineqartussanngorpoq.
Nunatta Eqqartuussisuuneqarfiani Nuummiittumi suliaq nalunaaqutaq 9.00 aallartinneqarpoq.
Foto: Morten Okkels
Nuummi Nunatta Eqqartuussisuuneqarfiani ataasinngornerup ullaap tungaaniit ukiup siuliani suliat uissuumminartut ilaat sammissavarput.
KNI-mi naatsorsuuserisuusimasoq ukiuni 2014-imiit 2021-mut katillugit 3,8 millionit koruunit sinnerlugit peqquserlullunilu allagaatinik eqqunngitsunik suliaqarnermigut pissarsisimava?
- Naamik, KNI-mi sulisuusimasoq pinngitsuutinneqarusuttoq oqarpoq.
Qeqqata Eqqartuussisoqarfiali maajimi 2024-mi allatut isummerpoq. Unnerluutigineqartup unnerluussisullu eqqartuussut taanna suliareqqitassanngortippaat, taamaammallu maanna Nunatta Eqqartuussisuuneqarfiani suliarineqalerluni.
Eqqartuussisoqarfiup aalajangiinera naapertorlugu KNI-mi pisortaasimasoq aningaasarsianut nalunaarsuiffimmi imminut pilersissimavoq saniatigullu aningaasarsianut akiligassanik akiliisitsisarnini ingerlatiinnarlugu. Tassunga atatillugu allallanik eqqunngitsunik atsiornertalerlugu suliaqarsimavoq.
Aningaasaqarneq pillugu suliaq annertooq
Nunatta Eqqartuussisuuneqarfiata eqqartuussut tamanna isumaqatigineraa qanorlu kinguneqassanersoq qanittukkut paasinarsissaaq.
Ataasinngornikkut oqaluuserisassani siullersaasoq tassaavoq suliami uppernarsaatinik ulikkaartumi qanoq annertutigisumik saqqummiisoqassanersoq. Unnerluussisoq suliami qupperneq "ringbindip pingajuanni qupperneq 366" ullaap ingerlanerani innersuuppaa.
KNI-mi aningaasaqarnermut pisortaasimasup nassuiaataa ataasinngornermi immaqa tusarsinnaassavarput. KNI-mi aningaasaqarnermut pisortaasimasoq marlunngornermi nassuiaateqassaaq.
Eqqartuussivimmit ilisimatitsissutigineqarpoq suliap pingasunngornermi naammassineqarnissaa anguniarneqarpoq, taamaanngippat sisamanngornermi aamma suliarineqassalluni.
