KNI-mut tunngatillugu eqqartuussinermi ilisimannittoq pingaarutilik nassuiaasoq

KNI-mi naatsorsuuserisut pisortarisimasaat pillugu suliami immikkoortoq alla marlunngornermi aallartippoq. Unnerluutigineqartoq peqquserlussimasutut allakkanillu katillugit 5 millionit koruunit missaannik naleqartunik eqqunngitsunik suliaqarsimasutut ukiuni pingasuni pineqaatissinneqarsimasunut inissiisarfiimmiittussanngortinneqarpoq.

Angut 58-inik ukiulik eqqartuussut allanngortinniarlugu imaluunniit sakkukinnerulersinniarlugu suliassanngortitseqqiinikoq Nunatta Eqqartuussisuuneqarfiani maanna issiavoq, unnerluussisulli sakkortunerusumik pineqaatissiisoqarnissaa piumasaraa.

KNI-mi pisortaasimasup suliamut atatillugu akiligassarpassuit ilaat pillugit ullaakkut oqaluttuarpoq.

Allakkanik eqqunngitsunik suliaqarsimasoq siusinnerusukkut allaaseraarput. Taassuma akiligassat akuerineqarnissaannik qulakkeerinninniarluni aningaasaqarnermut pisortaarisimasanilu mailikkut attaveqatigiinnerit eqqunngitsut nammineq suliarisimagai aamma unnerluutigineqarpoq.

Taanna unnerluussut eqqartuunneqartup akerleraa. Mailit taakku nassiunneqarnikuupput, oqarpoq. Soormiuna aningaasaqarnermut pisortap mailiani nassaarineqarsinnaanngitsut unnerluussisussaatitaasoq aperaa:

- Teknikkimut tunngavoq, akisinnaanngilara, unnerluunneqartoq akivoq.

- Teknikkikkut pissuteqarsimanissaa kisiat oqaatigisinnaavat? unnerluussisussaatitaasoq aperivoq.

- Aappi.

Aammattaaq illersuisup naatsorsuuserit pisortarisimasaata nammineq aningaasaqarneranut tunngasut 2011-mi pilersisimagunagai ukiullu tulliuttut ilanngullugit nutartertarsimasai nassuiarpaat.

Taamaalilluni unnerluunneqartup aningaasaqarnini aqunnerugaa illersuisup uppernarniarpaa, naak unnerluussisussaatitaasoq killormut isumaqaraluartoq. Aamma aningaasanik tigusinnaasaminik tigusisarsimanera.

Taamaalilluni naatsorsuuserisut pisortarisimasaat nikuippoq eqqartuussiviullu qeqqani issiavimmut tullia inissaqartilerlugu.

Aningaasaqarnermut pisortaasimasoq nassuiaatinneqartoq

Eqqartuussisoqarfimmi suliaq suliarineqarmat ilisimannittut arlaliupput. Maani Nunatta Eqqartuussisuuneqarfiani ataasiinnaq qaaqquneqaqqippoq, tassa taamanikkut aningaasaqarnermut pisortaasimasoq. Taannalu unnerluutigineqartumit allaanerusumik nassuiaateqarpoq. Aningaasarsiat suli akileraaruserneqanngitsut aamma sammineqangaatsiarput.

Akissarsiat, ataatsimiinnerit aamma naatsorsuuserisut pisortarisimasaata akissarsiai 2019-imi paasinarsarneqartussat pillugit nassuiaavoq.

Aningaasaqarnermut pisortaasimasup akiligassat ajornartorsiutitallit 2021-mi paasisimallugit oqaluttuarpoq.

Aningaasat tunniunneqarnissaat sioqqullugu akuereqqaartussaagaluarpai, takusimanngilaali. Taakku ilaat atsiornera pitsaanerpaanngitsumik ilaarlugu atsiorneqarsimapput, oqaluttuarpoq.

- Pappiaqqat taakku atsiorsimanagit qulakkeerlugu oqaatigisinnaaviuk? unnerluussisoq aperaaq.

- Aap, 100%-imik qulakkeelugu oqaatigisinnaavara, ilisimannittoq akivoq.

Eqqartuussivimmi piffissaq sivittajaaq atorlugu aningaasaqarnermut pisortaasimasoq akiligassat arlallit akuerisimannginnerarlugit uppernarsarpai, imaluunniit akuerisimasai kingornali aningaasanik nutaanik ilaneqarsimasut.

Nammineq pisortaanerlu kisimik akiligassat akuerisinnaallugit oqaatigaa.

Aammattaaq mailikkut allaqatigiinnerit peqataaffigisimarpasitai ilisimannittumut takutinneqarput. Taakkununngali allatanut akuusimanngilaq aamma qarasaasialerisunut paasiniarsimallugu oqaluttuarpoq.

Tamatuma kingunerisaanik unnerluutigineqartoq oqaloqatigineqarnissamut qaaqquneqarsimagunarpoq, kisianni akiligassat eqqumiitsut pillugit nassuiaatissaqartinnagu. Taamaasilluni paasinarsivoq naatsorsuuserisut pisortarisimasaat KNI-mi suliinnarsinnaanngitsoq, aningaasaqarnermut pisortaasimasoq oqaluttuarpoq.

Nunatta Eqqartuussisuuneqarfiani pingasunngornermi eqqartuussut paasitinnagu illuatungeriit tamarmik naggataarutaasumik oqaaseqartaat kisimik saqqummiunneqassapput.