KNI'p sipaarniuteqarniarnera Siumup isornartorsiorpaa - Isorliunerusuni ajorseriaateqartitsiniartoqarnera Siumup akuersaanngilaa
Isorliunerusuni pilersuineq killeqareerpoq. Taamaattumik Pilersuisup pisiniarfiisa ammasarfiisa sivikinnerulernissaat nioqqutissallu amerlannginnerulernissaat akuerineqarsinnaanngilaq. Taama Siumup siulittaasuata Aleqa Hammondip KNI-p amigartoorutinik 75 million koruuninik matussusiiniarluni sipaarniarniarnera isornartorsiorpaa.
Assi: Oscar Scott Carl
Amigartooruteqarneq mumisinniarlugu KNI A/S iliuuseqarpoq.
75 millionit koruuninik amigartooruteqarunnaarluni aappaagu 50 millioninik aappaagumut sinneqartooruteqarnissaq sulissutigaat.
Pilersaarutaalli pitsaavallaannitsoq, Aleqa Hammond, Siumumi siulittaasuusoq isumaqarpoq:
- Siumup akuersaanngilaa isorliunerusuni nioqqutissanik kiffartuussinernillu ajorseriaateqartitsiniartoqarnera. Allannguutit pitsanngorsaataasussaapput –
ajorseriaataasussaanngillat, Aleqa Hammond, Siumumi siulittaasuusoq tusagassiuutitigut allappoq.
Ammasarfiit sivikillineqarnissaat, nioqqutissallu toqqagassat ikilisinnissaat ilaatigut anguniagaavoq. Isorliunerusunili najugaqartunut tamanna ajorseriaannassasoq, Aleqa Hammond isumaqarpoq.
- Maannakkut isorliunerusuni nioqqutissaqarnikkut pilersuinikkut oqariartuutigineqarpoq pilersuinikkut ajorseriaateqassasoq, tassagooq ammasarfii sivikillisinneqariarlutik nioqqutissat ikinnerusut kisiisa aallaavigalugit ingerlatsisoqassasoq. Tamanna Siumumiit sakkortuumik akerlilerparput akuersaarsinnaanagulu oqariartuuteqarluta.
Hammond: Naalakkersuisut akuliuttariaqarput
Taassuma aamma eqqaamaa isorliunerusuni najugaqartut pisiniarfik ataaseq periarfissatuarigaa, soorlu allakkerivitut, aningaasanik tigusisarfittut allanillu.
- Isorliunerusut aammalu nunatta avannaani nunaqarfippassuaqartuni niuernikkut periarfissarpassuaqanngitsumi neqeroorutinillu takuffiorpianngitsumi najugaqartut pisiniarfeqarnikkut toqqagassarpassuaqanngillat.
Naak KNI A/S sinneqartoorut aaqqinniarlugu iliuuseqaraluartut, Aleqa Hammond isumaqarpoq Naalakkersuisut akuliuttariaqartut:
- Naalakkersuisut akulerullutik aaqqiissutissatigut pitsaasumik nassaarniarnermi partiit tamaasa suleqatiginnissutigisaanik pitsanngoriaatissatigut tikkuussinissaq ujartorneqassasoq isumaqarpugut.
