KNR-ip pisortaa: Suliumajunnaarneq akuerineqarsinnaanngilaq
Pisortat nutaarsiassaqartitsivimmi sulisut isumaqatiginninniarfiginiarsimagaat KNR-imi pisortaagallartoq Bjørk Lange Olsen oqarpoq, sisamanngornermilu suliumajunnaarneq akuerineqarsinnaanngitsutut taavaa.
Assi: Leiff Josefsen
- Siullermik, pissutsit ajuusaarnarput, ingammik maannakkut qinerqqusaartoqarnerani.
KNR-ip pisortaagallartua Bjørk Lange Olsen KNR-ip nutaarsiassaqartitsiviani sisamanngornermi suliumajunnaartoqarnera pillugu taama oqarpoq.
KNR-imi nutaarsiassaqartitsivimmi sulisut 16-it sulinermik tatineqarpallaarnertik KNR-illu aqutsisuinit tusarnaarneqannginnertik pissutigalugit februaarip 27-ani suliunnaarniarlutik pingasunngornermi nalunaarput.
Bjørk Lange Olsen KNR-imi pisortaasimasoq Annga Lynge soraarsitaammat pisortaagallartussatut qanittukkut toqqarneqarpoq.
Isumaqatigiissummik unioqqutitsisoq
Sulinermik unitsitsisoqarnera ajuusaarnarpoq, sisamanngornermilu ullaap tungaani aaqqiissutissarsisimanngilaq, suliniulli ingerlanneqaleruttorpoq, pisortaq oqarpoq.
Suliumajunnaarneq tamanna isumaqatigiissutinut akerliusumik iliuuseqartoqarnerusoq naqissusiivoq, tamannalu ilungersunartutut isigineqarpoq:
- Sulisut uternissaat kissaatigaarput. Tamanna isumaqatigiissutinut akerliusumik suliunnaarneruvoq, akuerineqarsinnaananilu.
- Sulinnginnerat unioqqutitsilluni suliunnaarneruvoq. Tamanna ilungersunartutut isigaarput, tassami ingerlatsinitsinnut sunniuteqangaartarpoq.
Sulisut sulinngitsoortut sulinngitsoornerminnut akissarsiamikkut ilanngaafigineqassasut pisortaaneq oqaluttuarpoq.
Sulisut tallimat immikkoortortaqarfinnit allanit nuunneqartut
Bjørk Lange Olsen naapertorlugu KNR-imi nutaarsiassaqartitsivimmi sulisut pisariaqartitaat matussuserniarlugit suliaallu oqilisaanniarlugit iliuuseqartoqarsimavoq:
- Tatineqarpallaarunnaarniassagatta sulisut tallimat, tusagassiortut sisamat radiomilu aviisiliornermi misilittagalik ataaseq, nutaarsiassaqartitsivimmut ataasinngornermili nuuppagut.
- Tamanna aaqqiissutissarsiornitsinni iliuuserisimasatta ilagaat, Bjørk Lange Olsen oqarpoq.
Radiukkut aviisi qallunaatuinnaq saqqummertartoq matugallarneqassasoq pisortat aamma siunnersuutigigaat ilanngullugu oqaatigaa.
Radioaviisimi sulisut pingasunngornermi nalunaaruteqarnerat naapertorlugu, internetikkut tv-kkullu aallakaatitsineq nukissaqarfiginerujumallugu, Inatsisartunut qinersinerup naammassinissaata tungaanut kalaallit qallunaallu radioaviisiat matuneqarusupput.
Aqutsisinnaatitaaneq aalajangiusimagaa
Bjørk Lange Olsenip sulisut tatineqartut paasisinnaallugit oqarpoq:
- Tatineqarsimasut paasilluarsinnaavarput. Tamanna aaqqiissutissarsiussavarput.
- Sulisitsisup aqutsisinnaatitaanerata isumaqatiginninniutiginiaraluarnera akerleriissutaavoq. Tassa kikkut suliassanik sunik suliaqartassanersut, qanoq qaqugulu taamaaliussanersut. Kisianni nutaarsiassaqartitsivimmi ingerlatsisoq tamakkuninnga aalajangiisussaavoq. Tamanna maani allaniluunniit isumaqatigiinniutigineqarsinnaanngilaq.
- Sulisitsisut aqutsisinnaatitaapput, tamannalu suliffinni tamani atuuppoq, tamannalu ataqqineqartariaqarpoq, Bjørk Lange Olsen oqarpoq.
Qanittukkut aaqqiisoqarnissaa neriuutigigaa
Aaqqiissutissanik oqaloqatigiinneq aallarteqqinneqaqqullugu sulisut piaarnerpaamik uternissaat maanna neriuutigaa:
- Akerleriinneq tamanna kissaatiginngilarput. Matu ammavoq. Oqaloqateqarusuppunga. Uternissaminnut tikilluaqqusaapput. Tamaasa pisariaqartippagut, ingammik piffissami matumani, Bjørk Lange Olsen oqarpoq.
