Kommunit mianersoqquneqaraluarlutik ilitsersorneqaraluarlutillu kukkussutigisartakkatik suli kukkussutigisarpaat

Ombudsmandi, Gedion Jeremiasseni maanna ukioq ataaseq sinnerlugu atorfeqarsimalerpoq. Piffissaq siulleq naammattumik eqqortumillu pissutsit qanoq innerinut paasisimasaqarfiginnileqqaarnissani pisariaqartissimavaa: 

- Piffissarlu taamatut atorsimavara, tikeraarfigisimasannilu kommunit annertoorujussuarmik unamminartorsiortarnerat ilisarisinnaavara. Nalinginnaasumik ingerlatsineq pillugu inatsiseqartitsinikkut unamminartoqartitaat paasivakka ilaatigut allattuisussaanerit, tunngavilersuisussaanerit, inatsisit aalajangersagaannik pingaarutilinnik innersuussinerit aamma naammagittaalliorsinnaanermi ilitsersorneqarnissat piumasaqaatitaannut attuumassuteqartartut. 

- Aamma suliani aalajangersimanerusuni immikkuullarinnerusumik inatsiseqartinneqartuni kommuninit akisussaaffigineqartuni takussaasarput, pingaartumik isumaginninnikkut suliani, taammaattut uannut naammagittaalliutigineqarnerpaasarmata.

Suliassat pingaarnerit kukkuluttorfigineqakkajuttut

Innuttaasut nakkutilliisuattut, kukkuluttorfigineqakkajuttartut takuai.

- Taamaattuni suliat takusarpakka suliat meeqqanik inissiinernut angerlartitsinernullu, aamma suliat siusinaarluni sulisinnaajunnaarnersiuteqalernissamut tunngasut. Taakkua marluk tassaapput suli kukkuluttorfiusartut. Naak tassaagaluartut isumaginninnikkut ingerlatsinermi suliassat pingaarnersaat. 

Suliat puigorneqanngikkunik kukkuneqartut

Kommunimut inunnik isumaginninnermut tunngasunik sulialinnut saaffiginnikkaanni, nutaarsiassaanngilaq sulisut nutaat takujuarneri. Tamannali suliat suliarineqarnerannut ajornartorsiortitsillunilu unammillertitsivoq:

- Isumaginninnikkut inatsisilerinermi piffissaq suliap suliarineqarneranut atorneqartartoq ajornartorsiutaavoq ersarissoq. Suliat puigorneqartarput, sivitsorsarneqartarput naammassinngitsoorneqarajuppallaarlutillu. Suliani suliarisanni kommuninit oqaaseqaasiornermi, piffissaq suliap suliarineqarneranut atorneqartartoq pillugu utoqqatsissutigineqarajuttarpoq sammisani suliaqarsinnaasunik sulisussaaleqisarneq. 

- Suliami pisut pinerat najoqqutaralugu tulleriissaarnilikkamik kommunimut noqqaassuteqaruma imatut pisoqarajuppallaarujussuarpoq, tassa kommunit suliap ingerlasimaneranik saqqummiussassaliornerminni minitarpassuaqartarnerat, minitaallu pillugit apersuillunga nassuiaaqqusiguma, qularutissaanngilluinnartarluni akissutisiassara tassaasoq; sulisoq taanna suliunnaarnikuuvoq, taamaammat susoqarsimanera naluarput, immaqaluunniit qanga taama pisoqarsimanera naluarput. Tamanna akuersaarneqarsinnaanngilluinnarpoq, Gedion Jeremiassen allappoq.

Kukkuluttorfiusartut ikilisinniarlugit ilitsersuineq

Pisortat oqartussaatitaanik ingerlatsineq pillugu inatsiseqartitsinikkut ukiaqartarnerat ikorfartuiffiginiarlugu, siorna naalakkersuisoqarfinnut kommuninullu tamanut oqartussaasunut ilitsersuummik ombudsmandi nassiussuinikuuvoq. Peqatigitillugulu oqartussaasunut ilitsersuut nittartakkami aaneqarsinnaanngortillugu.

- Paasivara oqartussaasunut ilitsersuut, pisortat oqartussaatitaasa akorluarsimagaat. Piviusorlu unaavoq, kommunini isumaginninnermi ingerlatsiviit katussillutik oqartussaasunut ilitsersuut aallaavigalugu ilinniusiornerat, uagullu neqeroornikuuvugut, taanna piareeriarpat kukkunersiorlugu misissorsinnaagipput.