Løkke: Qallunaat Trumpip Kalaallit Nunaat pillugu oqaaserisaanut isornartorsiuinerat Rubiop tusarnaarpai
Trumpip Kalaallit Nunaat pillugu oqaasii "akuersaarneqarsinnaanngitsut" Lars Løkke Rasmussenip Marco Rubio ataatsimeeqatigereerlugu oqarpoq.
Danmarkip nunanut allanut ministeria Lars Løkke Rasmussen USA-p nunanut allanut ministeria Marco Rubio oqaloqatigaa.
Assi: Jacquelyn Martin/Reuters/Ritzau Scanpix
Trumpip Kalaallit Nunaat pillugu oqariartuutai qallunaanit isorineqarnerat tusaaniarneqartoq Danmarkip nunanut allanut ministeriata Lars Løkke Rasmussenip (M) USA-p nunanut allanut ministeria Marco Rubio ataatsimeeqatiginerani misigaa.
Lars Løkke Rasmussen Nato-p Bruxellesimi qullersaqarfiani Rubiomik ataatsimeeqateqareerluni qallunaat tusagassiortuinit apersorneqarluni oqarpoq.
- Naalagaaffik sinnerlugu erseqqissaanissamut periarfissaq soorunami atorluarpara.
- Tassa Amerikamiut præsidentiata Kalaallit Nunaannik tiguaaniarluni oqariartuuteqartuarnera akuersaarneqarsinnaanngitsoq oqaatigaara, Lars Løkke Rasmussen ataatsimiinnerup kingorna oqarpoq.
Kalaallit Nunaat USA-mit pigineqartariaqarneranik Donald Trumpip oqariartuuteqarnera killissamik qaangiinerusoq qallunaat nunanut allanut ministeriata Rubiomik ataatsimeeqateqareerluni oqaatigaa.
- Nunat tamalaat inatsisaannut naapertuutinngitsuliorneruvoq. Kunngeqarfittut aalajangiisinnaassuseqarnerput unammillerneqalerami.
- Kunngeqarfiup inissisimaffia qularutigineqassanngimmat nunanut allanut ministerimut erseqqissarnissaa pingaaruteqarmat, Lars Løkke Rasmussen oqarpoq.
Ataatsimoorluni oqaloqatiginninneq
Marco Rubio tamanna qanoq qisuariarfigaa?
- Uanga nammineq oqaatiginngisannik issuaassagumi naapertuutinngilaq. Pisulli naqissusernissaa pingaaruteqarsoriinnarpara, Lars Løkke Rasmussen oqarpoq.
Danmark 1949-mi Nato-mik pilersitseqataasoq, taamanimiillu Danmarkip USA-llu “Kalaallit Nunaata illersornissaa ataatsimoorfigigaat" oqarpoq.
- Ukiut 100-t sinnerlugit USA-p Kalaallit Nunaat kunngeqarfiup Danmarkip ilagigaa akueraa. Isumaqatigiissutit amerlasuut tamatumunnga naqissusiipput.
- Issittumi sillimaniarnermut politikki nutaaq, Kalaallit Nunaannut attuumassuteqartoq, oqallisigineqassappat tamanna ataatsimoorluta oqallisigissavarput. Tamatuma erseqqissarnissaa uannut pingaaruteqarsimavoq, Lars Løkke Rasmussen oqarpoq.
