Motzfeldt: Jessip oqaasii toqqissisimannginnermik tunngavissaqanngitsumik pilersitsipput
Siumup siulittaasuata tulliata Vivian Motzfeldtip parteeqatini Jess G. Berthelsen, Kuannersuarni aatsitassarsiornissamik suliniut aallartinniarlugu qineqqusaarumalluni oqarsimasoq, naqqippaa.
- Tamanna Kujataani, pingaartumik Narsami, najugaqartunut pisariaqanngitsumik tunngavissaqanngitsumillu toqqissisimajunnaarsitsisuuvoq, Siumullu aalajangiinera qularnartoqalersillugu, Vivian Motzfeldt Jess G. Berthelsenip oqaasii pillugit allappoq.
Assi: Leiff Josefsen
Ukiorpassuarni SIK-mi siulittaasoq Jess G. Berthelsen Siumut sinnerlugu Inatsisartunut qinigassanngortippoq, pingasunngornermilu Kuannersuarni aatsitassarsiornissaq pillugu KNR-imut oqaaseqaqattaarpoq.
Nunami aningaasaqarnikkut ineriartorneq eqqarsaatigalugu suliniut ingerlaannaq aallartinneqartariaqartoq kattuffimmi pisortaq isumaqarpoq
- Arlaleriarlunga oqarnikuuvunga: Kuannersuarni aatsitassarsiorfeqalertariaqarpoq. Soorunamili innuttaasunik peqataatitsinissaq uannut pingaaruteqarpoq. Kuannersuarni aatsitassarsiortoqassanersoq pillugu apeqquteqartoqartillugu innuttaasut tamarmik peqataatinneqarnissaat pisariaqarsinnaavoq, Jess G. Berthelsen KNR-imut oqarpoq.
- Uggornarpoq
Pingasunngornermili kingusinnerusukkut Siumup tusagassiuutinut nalunaaruteqarpoq, tassani siulittaasup tulliata Vivian Motzfeldtip Jess G. Berthelsenip oqaasii naqqippai.
Partiip ataatsimeersuarnerani aalajangikkanut akerliusumik iliornera ajuusaarutigaa:
- Tamanna
pisariaqanngitsumik tunngavissaqanngitsumillu Kujallermi, pingaartumik Narsami
najugaqartunut, toqqissisimatitsinngilaq aamma Siumup qanoq
aalajangersaasimaneranik nalornilersitsivoq, Vivian Motzfeldt allappoq.
Taanna naapertorlugu Kuannersuit pillugit apeqqut nuna tamakkerlugu ataatsimeersuarnermi kingullermi inaarutaasumik aalajangiiffigineqarpoq, Siumumilu siulersuisut maannakkut suliassap ammaqqinneqarnissaa pilersaarutiginngilaat:
- Maanna
Siumumi aqutsisut pilersaaruteqanngillat apeqqut qaqeqqissallugu. Taamaattumik Kuannersuaq
aatsitassarsiorfiulissanersoq Siumup partiitut Inatsisartunut
siunnersuutiginavianngilaa, aamma Naalakkersuisuutitaqaqqilissagutta apeqqut
suliassanut ilaanavianngilaq, Motzfeldt oqarpoq.
Qinersinermi kingullermi uran pingaaruteqarluinnartoq
Kuannersuarni aatsitassarsiornissaq tamatumalu kingunerisaanik uranimik piiaanissaq 2021-mi Inatsisartunut qinersinermi kingullermi IA-p partiini anginersanngortinneqarnerani pingaaruteqarluinnarput.
Inerteqquteqarnikkut aatsitassarsiornissaq unitsikkallarneqarpoq. Aatsitassarsiorfiup namminersorlutik oqartussat qallunaallu naalagaaffiat 76 milliarder koruunit missaannik taarsiiffigeqqulluni unnerluutigai.
