Naalagaaffeqatigiinni pinerlunnerit Kalaallit Nunaanni amerlanerpaasut

Naak pinerluttulerinermi inatsit naapertorlugu nalunaarutigineqartut 2024-mi ikileriarujussuarsimagaluartut, Danmarkimi Savalimmiunilu pissutsinut sanilliullugit suli qaffasinnerujussuupput.

Assi: Leiff Josefsen

Jørgen Schultz-Nielsen tusagassiortoq

Saqqummersinneqarpoq 7. Marsi 2025 - 17:36

Annonse

Savalimmiuni pinerluttulerinermut inatsit naapertorlugu nalunaarutigineqartut amerleriaateqalaarput, 2024-milu innuttaasunut 1000-iugaangata 13,2-upput. Danmarkimi 46,7-iupput, Kalaallit Nunaanni qaffasinnerpaalluni 68,3-jusoq.

Tamanna Kalaallit Nunaanni Politiit ukiumoortumik kisitsisaataanni 2024-moortuni ataasinngornermi saqqummiunneqartuni takuneqarsinnaavoq.

Kisiannili toqutsinerit nakuusernerillu aamma aningaasanik pissarsiniarluni pinerluttuliornerit ikilisimammata isumalluarnarpoq.

Politiit qaqugukkut nakuusertoqartarnersoq nalunaarsorsimavaat.

Paasinarsivoq arfininngornerup unnuaani nakuusertoqakulasartoq, sapaatillu unnuaani nakuusertoqakulannginnerulluni, sapaatilli akunnerani ulluni allani nalunaarutiginninnerit ikitsuinnaasarlutik.

Ikiaroornartunik pinerlunneq ukiup siulianut sanilliullugu 2024-mi qaffappoq. Hashi 115 kg-t sinnerlugit oqimaassusilik arsaarinnissutigineqarpoq — ukiup siulianut sanilliullugu 20 kg-t missaannik annertunerusoq.

Hashi skunkilu kisimik nunamut eqqunniarneqanngillat. Ilanngaaserisut politiillu aamma ikiaroornartunik sakkortunerusunik soorlu LSD-mik, kokainimik, ecstasy-mik amfetaminimillu eqqussuisoqartartoq paasisimavaat. Tamakku qaavatigut iisartakkat dopingimik imallit aamma arsaarinnissutigineqarsimapput.

5 millionit koruuningajaat arsaarinnissutigineqartut

Aningaasattaaq 4,9 million koruuningajaat arsaarinnissutigineqartut Kalaallit Nunaanni Politiit ukiumoortumik kisitsisaatiminnittaaq paasissutissiipput.

Ikiaroornartut pillugit eqqartuussivimmi suliassiissutigineqarsimasut 74 procentiini unnerluunneqartoq pisuutinneqarpoq. 2 procentiinnaat eqqartuussivimmi pinngitsuutinneqarput, 24 procentiilu unitsinneqarmata taakkunannga 71 procentit „uppernarsaatit amigaataanerat“ pissutigalugu unitsinneqarput.

Amerlanertigut angutit pinerluttuliorsimasutut eqqartuunneqartarput. Suiaassutsit immikkoortikkaanni 81 procentii angutaallutillu 19 procentii arnaapput.