Naalakkersuisut spiralilersuinermi suliami taarsiissutissanik ammaassipput
Naalakkersuisut arnanut ulloq 1. Januar 1992-p kingorna akuersitinneqaqqaarnatik ilisimanngisaminnilluunniit spiralimik ikkussiffigineqarlutilluunniit naartunaveersaaserneqarsimasunut ajunngitsorsiamik qinnuteqarnissamut ammaassipput.
Naaja H. Nathanielsen (IA).
Foto: Oscar Scott Carl
Naalakkersuisut qallunaat naalagaaffiat peqatigalugu spiralilersuinermik suliamik taaneqartumi, arnat akuersitinneqaqqaarnatik ilisimanngisaminnilluunniit spiralilerneqarlutilluunniit naartunaveersaaserneqartunut utoqqatserput.
Maannalu Naalakkersuisut alloriaqqillutik arnat eqqorneqartut taarsiivigineqarnissamik qinnuteqarsinnaanerannut ammaassipput. Taarsissutissat arnanut Kalaallit Nunaata ulloq 1. Januar 1992-p kingorna peqqinnissaqarfimmik tigusinerisa kingorna, suliami eqqorneqartunut neqeroorutaassaaq.
Taarsiivigineqarnissamut qinnuteqaat Sullissivik.gl-ikkut pissarsiarineqarsinnaasoq, ukiullu sinnerani qanoq qinnuteqartoqarsinnaaneranut paasititsiniaanerit ingerlanneqassasut, Naalakkersuisut nittartakkakkut quppernerminni ilisimatitsipput.
Nathanielsen: Suliaq inatsisilerinerinnarmut tunngatinneqarsinnaanngilaq
Naalakkersuisut kiisami qinnuteqaatinik ammassinerat oqiliallaataasoq, Naalakkersuisoq Naaja H. Nathanielsen (IA) oqarpoq:
- Inuiaqatigiittut spiralilersuinermik suliap ilaani Namminersornerullutik Namminersorlutillu oqartussat ataanni ingerlanneqarsimasumi akisussaaffimmik tigusinissaq, Naalakkersuisunut pingaaruteqarpoq.
- Suliaq manna inatsisilerinerinnarmut tunngatinneqartunngortinneqarsinnaanngilaq – inuit ataqqinassusaat anniartitsisimanerlu matumani pineqarput. Ulloq 24. September Naalakkersuisut arnanut eqqorneqartunut pisortatigoortumik utoqqatserput. Ullumikkullu Naalakkersuisut oqaatitik timitalerpaat, Naaja H. Nathanielsen oqarpoq.
Qinnuteqaatinik naliliineq suleqatigiinnik inatsisilerinikkut peqqinnissakkullu ilinniarsimasunik immikkut ilisimasalinnik ingerlanneqassaaq.
Ajunngitsorsiassamik qinnuteqarnissamut toqqammavissat pillugit nalunaarummi uani paasisaqarnerugit.
Arnarpassuarnut 1992 sioqqullugu spiralinik ikkussivigineqarsimasunut, danskit naalakkersuisuisa saammaasseqatigiinnissamut aningaasaateqarfimmik pilersitsinermik suliaq, ilaatigut spiralilersuinermi eqqugaasunut aningaasanik taarsiinissamut periarfissiisoq, aallartereerlugu siusinnerusukkut oqaatigaat.
Tamatuma saniatigut eqqartuussivinni suliamik ingerlatsisoqarpoq, tassani arnat 143-t immikkut tamarmik 300.000 kr-nik taarsiivigineqarnissamik piumasaqarlutik danskit naalagaaffiat suliassanngortippaat.
