Nakuusertoqarneranut takunnissimasunik politiit ujartuipput

Aasianni pingasunngornerup unnuaani februaarip 19-ani peqqarniitsumik nakuusernermut atatillugu takunnissimasinnaasunik Kalaallit Nunaanni Politiit ujartuipput.

Angut Aasianni hotel SØMA-p tunuani aputip qaavaniittoq pillugu Politiit pingasunngornerup unnuaani nalunaaqutaq 00.11 nalunaarfigineqarput.

- Angut peqqarniitsumik nakuuserfigineqarsimavoq, politiillu maanna suliamut atatillugu takunnissimasinnaasunik ujarlerput, Politiit allapput.

Angut 43-nik ukiulik maanna Nuummi napparsimmavimmiittoq politiit paasissutissiissutigaat.

Nakuusernermut suliamut atatillugu SØMA-p eqqaani pasinartumik takunnissimasinnaasunik imaluunniit pisumut ilisimasaqarsinnaasunik Kalaallit Nunaanni Politiit ujartuipput.

- Marlunngornermi februaarip 18-iani angut taanna sumiinnersoq pillugu ilisimasaqaruit politiit aamma illit tusarfigerusuppaatsit.

Ilisimannittut politiinut uunga saaffiginneqquneqarput: 70 14 48.