Nato-p pisortaata Zelenskyj Trumpimut attaveqarluaqqilertikkusukkaa

Ukrainep præsidentiata Volodymyr Zelenskyjip Trump attaveqarfigileqqittariaqarpaa.

Nato-p generalsekretæria Mark Rutte BBC-mut arfininngormat oqarpoq.

- Præsident Zelenskyjip USA-p præsidentianut USA-milu qullersaqarfinnut attaveqarluaqqilernissaa pingaaruteqarpoq, Natomi pisortaq oqarpoq.

Ruttep tallimanngormat USA-p præsidentiata Donald Trumpip Zelenskyjillu tusagassiortunik katersortitsinerat, isumaqatigiinngissuterpassualik, "ajortumik" taavaa.

Ukrainemi aatsitassat pillugit USA Ukrainelu isumaqatigiissummik atsioqatigiittussaagaluarput.

Oqqatereernerulli kingorna isumaqatigiissusiornatik avissaarput.

Vicepræsidenti J.D. Vance oqannermi tamatumunnga aamma peqataavoq.

Zelenskyj oqaluttuarisaanermi Ruslandip præsidentillu Vladimir Putinip Ukraine qanoq sioorasaartarsimaneraat aamma siornatigut isumaqatigiissutigisimasaminnik unioqqutitsisarsimanerat oqaluttuarilermagu Trumpip Vancellu qujasuinnerarpaat.