Nunanut allanut ministereqarfik Kangiani Qiterlermi akerleriinnerup siaruaannissaanut aarlerisaarivoq
Danmarkimi nunanut allanut tunngasunut ministereqarfik naapertorlugu qallunaat Kangiani Qiterlermiittut Israelip Iranillu sorsunnerisa kingunerisaanik mianersortariaqarput.
Foto: Planet Labs Pbc / Reuters / Ritzau Scanpix
Iranip Israelillu akornanni sorsunnerit suli ingerlapput, sorsunnerillu Kangiani Qiterlermi sumiiffinnut allanut siaruaassinnaapput.
Nunanut allanut ministereqarfiup innuttaasunik sullissiviata sulisuisa qallunaat Kangiani qiterlermiittut sorsunnerup siaruaassinnaanera naliliiffigaat mianersoqqussutigalugulu. Taama allapput inuit nittartakkakkut attaveqaqatigiittarfiatigut X-imi, kiisalu nittartakkaminni angalanissamut ilitsersuummi.
- Pissutsit Kangiani qiterlermi sumiiffinnut allanut siaruaannissaa aarlerinarpoq, timmisartuussinerillu akornuserneqarsinnaapput taamaatitsiinnarnernik kinguaattoornernilluunniit kinguneqartumik, nalunaarlutik allapput.
Nunanut allanut tunngasunut ministereqarfiup innuttaasunut kiffartuussiviata Saudi Arabiamut, Arabiap Emiraataanut, Jordanimut, Bahrainimut, Kuwaitimut, Omanimut, Qatarimut Irakimullu angalanissamut siunnersuutit nutarterlugit allassimavaat.
Kaammattuutigaattaaq paasissutissai nutaat nittartakkani, attaveqatigiittarfinni, oqartussat nalunaarutai, akunnittarfinni angalatsitsiviillu malinnaaffigeqquneqarput.
Nunanut allanut ministereqarfiup innuttaasunut sullissiviata aamma ilisimatitsissutigaa, siunnersorneqartariaqaraanni nunanut allanut ministereqarfiup pigaartuisa oqarasuaataat ulloq unnuarlu sianerfigineqarsinnaasoq.
USA sapaatip unnuaani Israelip Iranillu akornanni akerleriissuteqalermat akuliuppoq. Sapaatip-akunnerani kingullermi Israelikkut tallimanngormat saassussinerisa kingorna pissutsit ajornerulerput.
USA-p atomimik nukissiorfiit pingasut saassuppai — Taakku Fordowimi illoqarfiup Qomip eqqaaniittoq aamma reaktorit allat marluk illoqarfiit Natanzip Isfahanillu eqqaaniittut pineqarput.
Saassussinerit iluatsissimasut, USA-p præsidentiata Donald Trumpip kingusinnerusukkut oqaatigaa.
Iranip nunanut allanut ministeriata Abbas Araghip pisut kanngunartutut sapaammi taavai, mianersoqqussutigalugulu kinguneqarumaartut.
Trumpip Iran akiniaaqqunagu mianersoqquaa.
Taassuma oqatigaa USA-p kissaatigiguniuk Iranimi saassussinerit amerlanerusut pisinnaasut.
/ritzau/
