Nunatsinni angalasut: Kipiluttunartoq, qasunartoq innarluutillillu sullinneqarnerat annertunerusinnaasoq
Aasaanerani nunatsinni angalasut unnuiffissaaleqineq, timmisartuussinerit taamaatiinnarneqartarnerat innarluutilinnullu sullissinerup annikinnera malugisarpaat.
Ilulissaniit timmisartuussinissat arlallit taamaatiinnarneqartarnerat pissutaalluni unnuiffissaaleqineq annertuvoq. Ilaasoq ataaseq nammineq kaasarfimminit akiliisariaqarsimavoq maannalu akiliutimi utertinneqarnissaa utaqqillugu.
Asseq toqqorsivimmit: Leiff Josefsen
Aasaanerani sulinngiffiup nalaani angalanissaq nuannerlunilu qasukkarnartussaagaluarpoq - amerlasuunulli kipiluttunarpoq qasunarlunilu.
Taama Inuutersuaq-Ulloriaq Løvstrøm ilaqutaasalu migisaat. Taanna nuliani meeqqanilu marluk angalavoq. Ilulissaniillu Uummannamut angerlarniarlutik ulluni tallimani kinguaattooqqapput.
- Ilulissani hotelit ulikkaaqqaannavipput, kinguaatoorattalu suna tamarmi ulikkaaqqalluni. Meerarput ersinngitsumik innarluuteqarmat, Air Greenlandimit kælderimut inissinneqarpugut. Kisianni taanna meeqqatsinnut peqqinnanngilaq, Løvstrøm oqarpoq.
Ataataasoq uteriilluni unnuiffissamik ujartuereerluni iluatsitsipput. Ersittumik ersinngitsumilluunniit Innarluutillit siulliullugit Air Greenlandimit sullinneqartarnissaat taassuma neriuutigaa.
Ullut arlallit piareersimajuarneq
Angalasoq alla, Aqqaluliit Broberg sisamanngornermi juulip ulluisa qulingannit Nuummiit Qaanaamut angalavoq, sulili Qaanaamut apuutinngilaq. Ullumikkut Pituffimmiittussaagaluarluni suli Ilulissaniippoq.
Taassuma oqaluttuaraa nammineq inissarsiortariaqarsimalluni hotellit ulikkaaqqammata. Namminerlu 9.150 koruuninik unnuiffissaminut akiliigallartariaqarsimavoq, Air Greenlandimit utertinneqartussanik. Tamannali angalasorpassuarnut artornarsimassasoq takorloorsinnaanerarpaa.
- Uku akiliigallarnissaminnut akissaqanngitsut eqqarsaatigaakka. Atuarfimmi sinittariaqartarput. Ukumi napparsimallutik nakorsiartut? Taakkununnga sakkortusimassaaq.
Silagitsillugili timmisartuussinissat taamaatiinnaneqartut kipiluttunarnerarpai.
- Ilulissani ataasinngormat seqinnarippoq, anorsaanngualaaginnarluni nuiananilu. Aamma Qaanaami - kisianni timmisartuussisoqanngilaq. Sooruna unnukkut silaginnerani angallassisoqartanngisoq? Aqqaluliit Broberg aperivoq.
Sermitsiamit Air Greenland pisut pillugit oqaaseqartinniarlugu attavigereerparput.
