Nuuk Sisimiullu umiarsuarnik takornariartaatinik tikinneqartartut amerliartorneranni siuttuusut
Umiarsuarnut takornariartaatinut ilaasut 2024-mi aatsaat taama amerlatigipput. Nuummi Sisimiunilu umiarsuarmik takornariat 2023-mut sanilliullugit amerlinerpaapput.
Toqqorsivimmiit assi: Leiff Josefsen
Siorna umiarsuarnut takornariartaatinut ilaasut 95.000-init amerlanerusut Kalaallit Nunaat tikissimavaat. 2023-mut sanilliullugu ilaasut 25 procentingajammik amerleriarsimapput, Naatsorsueqqissaartarfimmit kisitsisit nutaat tamanna takutippaat.
Umiarsuit takornariartaatit amerlanersaat 250-it tikillugit ilaasoqarsinnaapput, takornarialli amerlanersaat umiarsuarnut angisuunut 1.200-t sinnerlugit ilaasoqarsinnaasunut ilaasartut takornariaqartoqarnerpaapput.
Umiarsuarnik takornariartaatinik takornariarsimasut 95.185-iusut akornanni 63.339-t umiarsuarnit anginerusunit tikipput, kisitsisit kisitsisitigut paasissutissiinermut allaffeqarfimmit pissarsiarineqartut takutippaat.
Angalanerni 204-ni 493-it tulattut
Umiarsuit ilaasuisa amerlassusaat eqqarsaatigalugu umiarsualiviit tikinneqarnerpaat tallimaasut tassaapput Qaqortoq 46.630-nik ilaasoqarsimasoq, tulliullutik Nuuk (37.242-nik ilaasoqarsimasoq), Nanortalik (28.937-nik ilaasoqarsimasoq), Sisimiut (14.842-nik ilaasoqarsimasoq) tallimaattullu inissilluni Ilulissat umiarsuarnik takornariartunik 14.165-inik ilaasoqarsimasoq.
Nuuk Sisimiullu 2023-mut sanilliullugu tikinneqarnerpaasimapput, tassa ilaasut 5.582-inik aamma 2.657-inik amerleriarsimagamik.
Umiarsuarnik takorariartut Paamiuni (8.022-nik ikileriartunik) Nanortalimmilu (5.683-inik ikileriarltunik) ikileriarneri malugineqarput.
