Nuummi aqqusinermi biilit arlallit ajutoortut

OBS: Allaaserisaq nutarterneqarpoq.

Nuussuup Qinngorpullu akornanni aqqusineq politiinit maannakkorpiaq matuneqarallarpoq.

Kalaallit Nunaata Politiivini pigaartut pisortaat Malik Olesen Sermitsiamut ilisimatitsivoq biilit arlallit aqqusinermi angallannermi ajutoorsimasut, ajutoortoqarneranillu nalunaarut politiit tallimanngornermi ullaap tungaani nal. 10.15 pisimagaat.

- Biilit arlallit ajutooqataasimasut ilisimatinneqarpugut. Biilit marluk bussillu ataatsit aqqusinermi ajutoorput aporsimallutik, Malik Olesen ilisimatitsivoq. 

Inuit sisamat ajoqusertut

Politiit, qatserisartut ambulancellu ikiuigasuarniarlutik maanna sumiiffimmiipput.

Malik Olesen ilisimatitsivoq inuit sisamat ajutoornermi ajoqusersimasut, pinartoqartillugulu nakorsiartarfimmukaanneqarsimasut.

Nal. 12.00 aqqusineq ammarneqaqqippoq.

- Suliaqarsinnaajumalluta aqqusineq matusariaqarsimavarput. Biilit Qinngorpumukassagunik, taakanngaanniilluunniit Nuussuarmukassagunik mittarfiup aqqutaa aqqutigisinnaavaat, Malik Olesen oqaluttuarpoq.

Nuummi maannakkorpiaq annertuumik nittaappoq, isikkivilulluni. Ullup qeqqalernerani nittaakkunnaamissangatinneqarpoq.