Paasissutissat eqqunngitsut Kalaallit Nunaanni qinersinissaq sioqqullugu siammarterneqartut
Oqartussaasut Kalaallit Nunaanni qinersinissaq sioqqullugu eqqunngitsumik paasissutissiisoqartarneranik malinnaasut PET-imit ilisimatitsissutigineqarpoq.
Inatsit kinaassutsimik isertuussisumik nunanillu allaneersunit politikkerinut tapiissuteqartarnerup inerteqqutaalerneranik siunnersuutigineqartoq Kalaallit Nunaanni februaarip aallartinnerani akuerineqarpoq.
Assi: Steffen Trumpf/Ritzau Scanpix
Issittumi naalagaaffissuaqarfiit unammillernerujartornerat Kalaallit Nunaannilu qinersisoqarnissaa pissutigalugit eqqunngitsumik paasissutissiisoqangaatsiarpoq, tamannalu naalagaaffinnit allanit soqutigisaminnik siuarsaaniarnermut atorneqarsinnaavoq.
Politiets Efterretningstjeneste (PET) taama tusagassiuutinut nalunaaruteqarpoq.
Taamaammat oqartussaasut Inatsisartunut qinersisoqarnissaanut atatillugu nunanit allanit sunniisoqarsinnaanera eqqumaffigaat.
Nunamit allamit soqutiginninneq naapertuilluartuusinnaasoq, taamatuttaarlu diplomatiikkut, aningaasatigut kulturikkullu attaveqaatit aqqutigalugit soqutiginnittoqarsinnaasoq PET tusagassiutitigut nalunaarummi allappoq.
Aammali inatsisinik unioqqutitsilluni sunniisoqarsinnaavoq.
Ingammik inuit attaveqaqatigiittarfii paasissutissanik eqqunngitsunik siammarteriffiusarput.
Inuit Danmarkimi kalaallinilu politikeriunerartarlutillu taamaalillutik oqallinnerup avissaartuutsitsilerneranut ilaatigut sunniuteqartarput.
Aammattaaq kalaallit politikeriisa inuillu ataasiakkaat oqaaserisimasaat isummat aalajangersimasut siuarsarniarlugit ilanngunneqartarput.
Oqartussaasut pisoq malinnaavigigaat, inuiaqatigiillu nunanit allanit demokratii tunngavigalugu aalajangiisarnermut sunniiniartunut piareersarneqarnissaat sulissutigineqartoq PET-imit oqaatigineqarpoq.
Tamanna Kalaallit Nunaanni oqartussaasut qanimut suleqatigalugit pivoq.
Inatsisartuni amerlanerussuteqartut inatsisissatut siunnersuut februaarip aallartinnerani akueraat, tassani kinaassutsimik isertuussinikkut nunanillu allaneersunit partiinut politikerinullu tunissuteqartarneq inerteqqutigineqarpoq.
Inatsisissatut siunnersuut marlunngornermi Inatsisartut ataatsimiinneranni suliarigasuarneqarpoq, Naalakkersuisullu kissaataat malillugu “Kalaallit Nunaata politikkikkut ataqatigiinneranik illersuiniarluni” saqqummiunneqarpoq.
Inatsimmi immikkut ittumik aalajangersagaqarpoq, taamaalilluni kalaallit partiivi assersuutigalugu qallunaat Folketingianni partiinit suleqatigisaminniit aningaasatigut tapiiffigineqartuarsinnaapput. Aammattaaq nunatsinni partiit Danmarkimi pisortat partiinut tapiissutaannik pissarsisinnaapput.
/ritzau/
