Palle Jeremiassen Demokraatini ilaasortanngorpoq kommunimullu qinigassanngortilluni

Palle Jeremiassenip attaviitsuunera tamaanga killeqarpoq. Taannami maanna Demokraatini ilaasortaavoq.

Avannaata Kommuniani borgmesteri, Palle Jeremiassen kingullermik kommunimut 2021-imi qinersigatta taaguunneqarnerpaat tulliattut inissisimavoq, tassanili Siumumiit ilaasortaajunnaarpoq, nassuiaatigerusunnagulu sooq ilaasortaajunnaarnerluni.

Maannali partii ilaasortaffigerusutani nanivaa:

Demokraatit anguniagai qaninnerugai

- Demokraatini toqqissisimallunga misigivunga, massakkut inissisimaffinnut anguniakkannullu qaninnerpaammara. Qinigaaffimmi Lena Ravn Davidsen, Demokraatineersoq suleqatigilluarsimavara, anguniagai uanga aamma tunngavigigakkit, Palle Jeremiassen Sermitsiamut oqarpoq.

Taassuma ilanngullugu oqaluttuaraa aalajangerniarneq oqitsionnaasimanngitsoq, partiit allat suleqatigilluarsimaqigamigit. Qanigisanili tunuliaqutinilu oqaloqatigilluareerlugit Demokraatinut ilaasortanngorniarluni aalajangerpoq.

- Suleqatigisimasannut qujarusuppunga, suleqatigeeqqinnissamut piareersimavunga, pissanganarporlu qanoq inerneqassanersoq, qinersisartummi naalagaapput, naggasiilluni oqarpoq.