Paneeraq Olsen partiimut allamut nuuppoq Inatsisartunullu qinigassanngortilluni
Naalakkersuisuusimasoq Paneeraq Olsen Naleqqami ilaasortaajunnaarpoq, maannalu Siumut sinnerlugu Inatsisartunut qinigassanngortilluni. Kina kalaaliunera pillugu oqallinnermut, kiisalu ilaasortaasimasup qallunaat nunami siunissaat pillugu isumaanut qisuariaataavoq. - Avissaartuunneq toqqissisimanartutut misiginngilara, Naleqqamilu ilaasortatut illersorsinnaanagu, Paneeraq Olsen oqarpoq.
Leiff Josefsen
Paneeraq Olsen sinniisutut Inatsisartuni ilaasortaasareerpoq kiisalu Meeqqanut, Inuusuttunut Ilaqutariinnullu Naalakkersuisuusimalluni.
Taassuma Qeqqata Kommuniani Atugarissaarnermut pisortartut atorfeqarnissani piffissaq tamaat suliffiginiarlugu aalajangereernikuugaluarluni, Inatsisartunut qinigassanngortinniarluni aalajangerpoq. Nunatsinni inuiaqatigiinnilu allannguutit annertuut pisussaammata tunuarsimaarniarnani aalajangerpoq:
- Aalajangernikuugaluarama Sisimiuni piffissaq tamaat suliffiginiarlugu. Kisianni qinersinissaq qanilliatortillugu, nunarsuarmi pisut isiginngitsuusaaginnarsinnaanagit, sassarusussususera uummarami, noqikkaluarpunga, kisianni aalajangerpunga tassa sassarniarlunga. Misilittakkakka ilisimasakkalu suli atorluarsinnaavakka, Paneeraq Olsen oqarpoq.
Isumaginninneq qinikkatut ukkatariniaraa
Paneeraq Olsen Inatsisartunut qinigaassaguni meeqqanik sullissineq ukkatarerusuppaa, taassuma saniatigut inunnik sullissineq peqqinnissaqarfeqarnerlu aamma ukkatariniarpai. Atorfilittut sulisimanermini qinikkatullu atuuffeqarsimanermini misilittakkani nassataralugit.
Ilanngullugu oqaatigaa qinigaassaguni pisortatut atorfimminiit tunuarniuteqassalluni:
- Qinigaassaguma atorfinniit tunuarniuteqassaanga. Inatsisartuni ilaasortaaneq piffissamik atuiffiunartarpoq, taamaattumik piffissaq tamaat ukkatarissavara.
Paneeraq Olsenip atorfimminut isumaqatigiissutaa aappaagumut killeqarpoq, qinigaagunili politikkimut uteqqinnissaminut piareersimanerarpoq.
