Partiip siulittaasua: Naalagaaffeqatigiinneq Trumpimut illersuutaalluassaaq
Danmarkimik nukittunerusumik illersornissamut isumaqatigiissuteqarnissaq Kalaallit Nunaata Trumpip nunamik tiguaaniarneranut illersuutigisinnaasaani pitsaanerpaasoq Atassutip siulittaasua Aqqalu C. Jerimiassen isumaqarpoq.
Donald Trumpip Kalaallit Nunaat pillugu oqaaserisai kingulliit nuanninngillat, pissutsillu ilungersunarluinnarput, Atassutip siulittaasua Aqqalu Clasen Jeremiassen oqarpoq.
Assi: OSCAR SCOTT CARL
Kalaallit Nunaanni pissutsit ilungersunarput, USA-llu præsidentia inuuvoq navianartoq.
Taamatut isummerpoq Atassutip siulittaasua Aqqalu C. Jerimiassen Donald Trumpip sapaatip akunnerani matumani siusinnerusukkut USA-p inatsisartuini oqalugiareernerata kingorna. USA-p Kalaallit Nunaat “arlaatigut” pissarsiariumaaraa naatsorsuutigalugu Trumpip ilaatigut oqaatigaa.
- Pimooruppaa. Qanoq ulorianartiginersoq takusinnaavarput. Tamanna silarsuarmi eqqissinermut suleqatigisanullu toqqaannartumik ajoqutaavoq.
- Tamanna nuanniitsuullunilu ilungersunartorujussuuvoq, partiimi siulittaasoq oqarpoq nangillunilu:
- Inuk nunarsuarmi pissaaneqarnerpaaq nunat ilaannik "pigisatut" isiginnilluni oqaluttoq.
Qanoq iliortoqartariaqarnera qularutiginngilaa:
- Nunanut allanut ministeriusuuguma allagartaq NO-mik allassimasoq tigummiarlugu toqqaannartumik Det Hvide Husimukarlunga aallassagaluarpunga. Naqinnernik angisuunik allallugu!
Aqqalu C. Jerimiassen USA-mi Republikanerinut tapersersuisutut ilisimaneqarpoq. Trumpilli Kalaallit Nunaata tigunissaanik oqaaseqarnerata kingorna tapersersuiunnaarpoq:
- Republikanerit ilisarisinnaajunnaarluinnarpakka. Inuunera tamaat Republikanerit tapersersorsimavakka, maannali tapersersorunnaqarpakka. Parti ilisarisinnaanngilara.
- Donald Trumpip Putinimut, kisermaassilluni naalakkersuisumut, inussiarnernera akuerineqarsinnaanngilaq. Nunamut namminersortumut kanngunarsaasoq. Tamanna akuerineqarsinnaanngilluinnarpoq, aamma Ukrainep præsidentianut Zelenskyjimut ataqqinninnginnera akuerineqarsinnaanngilaq.
Apeqqut: Nunarsuarmi eqqissinermut ajoqutaasoraajuk?
_ Innermik pinnguarpoq. Allanik pisuutitsivoq, soorlu Zelenskyjimut tunngatillugu taamaaliortoq.
- Aatsitassanik pissarsisinnaanngippat nuna tamarmi Ruslandimit tiguarneqarsinnaassaaq. Trumpi soorlu Matadorinik pinnguartoq, Aqqalu C. Jeremiassen oqarpoq.
Apeqqut: Pissutsini taamaattuni Kalaallit Nunaata soqutigisai pitsaanerpaamik qanoq siuarsarneqarsinnaappat?
- Naalagaaffeqatigiinneq Nato-mi ilaasortat sinneri peqatigalugit illersuutiginerpaavarput. Killeqarfigut pillugit ministeriuneq Mette Frederiksen pitsaasumik illersornissamut isumaqatigiissusiorfigisariaqarparput , politikeri oqarpoq nangillunilu:
- Nunanit allanit - USA ilanngullugu - kanngunarsarneqannginnissarput qulakkiissavarput. USA-mik suleqateqarsinnaavugut, USA-milli tiguarneqassanngilagut. Amerikamioorusunngilanga.
