- Nunami maani imarsiornermut tunngasut tamarmik matumani eqqugaapput.
Imarsiornermik Ilinniarfimmi pikkorissartitsinernut aqutsisoq Svend Bjerge taama oqarpoq.
Iliuuserineqartussaq annikitsuinnaavoq.
Minnerpaamik nalunaarummik pilersitsisoqaraluarpat, suut tamarmik aaqqissagaluarput. Nalunaarummik pilersitsinissaq Namminersorlutik Oqartussanut ajornanngitsunnguussaaq, tassanimi allassimaannartussaammat peqqissutsimik isumaginnittut peqqissutsimut uppernarsaatinik suliaqartassasut.
Tusaaneqarnissarli ajornakusoortorujussuusoq, Svend Bjergep misilittagaqarfigaa.
- Peqqissutsimut Naalakkersuisoqarfimmit Attaveqaasersuutinut Naalakkersuisoqarfimmut uteqattaartinneqartarpugut, oqarpoq.
AG-mi Unniami quppernerni sapaatip akunnerani kingullermi, ilinniartut 19-it pikkorissarnermikkut allagartartaarsimasut allaaserivavut. Ilinniarfik nuannarineqartorujussuuvoq, takornariartitsinermimi siuariartornersuaqarnissaa ilimagineqarmat.
UPPERNARSAATIT ALLATTORSIMAFFIAT
Uppernarsaatit peqqissutsimik isumaginnittunit suliarineqarsinnaasut allattorsimaffiat Naalakkersuisut nittartagaanniippoq.
Allattorsimaffik nalilersorneqartuartartoq AG-p paasivaa, peqqinnissamullu isumaginnittunit
Ineqarnermut Attaveqaasersuutinullu Naalakkersuisoqarfimmut innersuunneqarsimasoq, umiartortut Kalaallit Nunaata imartaani umiartortut umiarsuit Kalaallit Nunaanni nalunaarsorneqarsimasut umiartorsinnaanermut allagartaannik qaqugukkut takusinnaanissaat pillugu apeqqut akissutissarsiniarlugu. Naalakkersuisoqarfik allakkatigut akissuteqarluni allappoq, allattorsimaffimmut oqartussaassuseqaratik, taakkumi peqqissutsimut oqartussanit isumagineqarmata.
Taamaattumik peqqissutsimut isumaginnittunut aamma peqqissutsimut Naalakkersuisoqarfik innersuussutigineqarput.
Taamaattumik AG-p suli akissutissarsinngilaa, Nunatsinni umiartortut uppernarsaataat, qaqugu allattugaatigineqalissanersut.
- Ilinniartulli 19-it uppernarsaatinik tuneqqammikkavut unioqqutitsillutik angalasarput, assersuutigalugu takornarianik umiatsiamut ilaatitsigunik peqqissutsiminnut uppernarsaatinik atuuttunik nassataqaratik, Svend Bjerge oqarpoq.
Umiarsuarni Nunatsinni umiartortut tamarmik, qanorluunniit atorfeqaraluarunik, peqqissutsimut uppernarsaammik peqarnissaat inatsisitigut piumasaqaataavoq, uppernarsaatillu ukiut marluk qaangiukkaangata nutarterneqartartussaallutik.
- Nunami maani nakorsanit peqqissutsimut uppernarsaammik pissarsisinnaaneq siornatigut ajornartorsiutaanngilaq.
- Danmarkimi umiartornermut nakorsanit peqqissutsimut uppernarsaat suliarineqartariaqartoq piumasaqaataavoq, maanili akuerineqarluni Imarsiornermut Aqutsisoqarfiup nalunaarutaani allassimammat, nakorsat Nunatsinni misissuisinnaassasut, pikkorissartitsinermik aqutsisoq nassuiaavoq nangillunilu oqaatigalugu ukiorpassuarni tamanna ingerlalluarsimasoq.
Siornali periaaseq tamanna allanngortinneqarpoq.
Umiartortut qalasiat
Imarsiornermut Ilinniarfimmit oqaatigineqartut naapertorlugit peqqissutsimik isumaginnittunit nalunaarut allanngortinneqarpoq, tassani oqaatigineqarluni umiartortut Nunatta imartaani angalasut peqqissutsimut uppernarsaatissaat suliarneqarsinnaajunnaartut, Nunatsinni umiartortunut inatsiseqannginnera pissutigalugu.
Tamatuma kinguneranik Nunatsinni umiartortut tamarmik inatsisinik unioqqutitsillutik imaatigut angalasalissapput.
Peqqissutsimut uppernarsaat ukiup ataatsip matuma siornagut Imarsiornermut Ilinniarfimmi ilinnialernissamut aamma piumasaqaataagaluarpoq.
Imarsiornermik Ilinniarfimmi ilinnialerniartunut pikkorissarniartunulluunniit peqqissutsimut uppernarsaat siorna tikillugu piumasaqaataagaluarpoq. Peqqissutsimulli uppernarsaatit maani pissarsiarineqarsinnaajunnaarmata, ilinniarfik allamik aaqqiissutissarsiortariaqarsimavoq.
- Ilinniartut allakkanik atsiortinneqartarput, tassani allaqqasarluni ilinniartoq peqqiilliulerpat, tamanna ilinniarfiup akisussaaffigissanngikkaa. Assersuutigalugu pikkorissartitsinitsinni ilinniartut ilaat immamut pissinnermini uummamminik unittoorpat, tamanna ilinniarfiup akisussaaffigissanngilaa, Svend Bjerge oqarpoq.
Peqqissutsimut uppernarsaammik pissarsisinnaannginnerup tamanna kinguneraa pisariaqartinneqartoq, pitsaanerpaanngitsorli.
Ilinniartut soorunami aamma tamanna toqqissisimanngissutigisarpaat.
- Ilinniartut atsiornissartik nangaassutiginngilluinnartarpaat. Umiartulernissartimmi pingaartikkamikku, kisianni Kalaallit Nunaanni imarsiortut maanna ajornartorsiorput, erseqqissaavoq.
Umiartortuusinnaanermut uppernarsaat
Aammattaaq kalaallit umiartortut nunaminni umiartortut allamik erseqqissumillu ajornartorsiuteqartarput.
Tassami peqqissutsimut uppernarsaat aamma umiartortuusinnaanermut allagartamut, pisortanit akuerisaasumut, inuup umiarsuarmi aalajangersimasumik atorfeqarluni imaatigut sulisinnaaneranik uppernarsaatitut aqqutissiuussisarmat. “Umiartorsinnaanermut allagartatut” atuuffeqartarpoq, Danmarkimilu Umiartornermut Aqutsisoqarfimmit pissarsiarineqartarluni.
Kalaallit umiartortut Danmarkimi imaluunniit nunani allani umiartortussat peqqissutsimut uppernarsaammik taamalu umiartornermut allagartamik ajornartorsiutiginagu pissarsisinnaasarput, tamannami Danmarkimi aamma Umiartornermut Aqutsisoqarfiup malittarisassaanut inatsisaanullu naapertuummat. Maanili tamanna pisinnaanngilaq.
Umiartortut taamaalillutik peqqissutsimut uppernarsaammik piniarlutik Danmarkiliarnertik namminneerlutik akilertariaqartarpaat taamalu umiartornermut allagartamik pissarsisinnaasarlutik.
Tassa Nunatsinni umiartortut peqqissutsimut uppernarsaammik taamalu umiartornermut allagartamik taaneqartartoq, pissarsiariniarlugu Danmarkimut angalanertik namminneq akilertariaqarpaat, umiartornermulli allagartaq Umiartornermut Aqutsisoqarfiup nittartagaatigut pisariitsumik pissarsiarineqarsinnaavoq.
- Tassa angallatip naalagaatut ilinniakkaminnik naammassinneqqammersut nalunaaquttap akunnerata affaani nakorsamit misissortinniarlutik Danmarkimut angerlamullu angalanertik namminneq akilertariaqarpaat, Svend Bjerge oqarpoq, taannalu aaqqiissutissarsiorsimagaluarpoq oqartussanullu assigiinngitsunut saaffiginnittarsimagaluarluni iluatsitsinanili.
Sakkortulaartumik oqaatigalugu, ilinniartitavut ilinniarsimasaminnik suliffittaarsinnaanngillat.
- Maanimi atuussinnaanngilaq, oqarpoq.
Illersugaanngitsut
Pikkorissartitsisarnermut aqutsisup Svend Bjergep pissutsit ukiuni tulliuttuni allannguuteqannginnissaat ernummatigaa. Tamanna qatsuppaa. Iliuuseqarsinnaanngitsutummi misigisimavoq.
Taanna inuttut isumaqarpoq, namminiilivinnissaq qineqqusaarnermi oqallisigineqarpallaartoq.
- Umiartortunut tunngasunut akisussaaffik sooruna qangali angerlaanneqarsimanngitsoq?
Politikerimut tamanna apeqqutigigaanni, akissaaq: “Aningaasat. Tamanna akissaqartinngilarput.” Namminiilivinnissamulli akissaqarsimarpasipput, anersaarululluni oqarpoq.
Immakkut angallannermut umiartortunullu akisussaaffik suli angerlaanneqarsimanngimmata paasisinnaanngilaa, naak isumaqatigiissutigineqaraluartoq imaatigut inuussutissarsiorneq Nunatsinni inuussutissarsiutit pingaarnerpaartarigaat.
- Maannakkulli kalaallit imarsiortut pisinnaatitaaffeqanngillat inatsisitigullu illersorneqaratik, oqarpoq.
Svend Bjerge nammineq aaqqiissutissamik siunnersuutissaqarpoq: Imarsiornermik Aqutsisoqarfik Kalaallit Nunaannit ingerlanneqalerli.
- Taava Kalaallit Nunaata imartaanut nammineerluta malittarisassaliorsinnaalissaagut, oqarpoq.
- Kalaallit umiartortut amerlanerunissaat politikikkut kissaatigineqarpat, taava aamma ilinniarnerup naammassisinnaanissaa ajornannginnerulersittariaqarpaat, Svend Bjerge oqarpoq.
