FØRSTE SPADESTIK
Permagreen Grønland A/S Nuummi tarnikkut nappaatilinnut immikkoortortaqarfimmik nutaamik sanaartorpoq
Aarsleffip suliffeqarfiutaata Dronning Ingridip Napparsimmavissua 6.500 kvadratmeterinik allilissavaa.
Assi: Permagreen Grønland A/S
Tarnikkut napparsimasunut napparsimavissaq, 22-inik siniffissaqartoq, marlunnik quleriinnik initalik ambulancinullu inissittarfissalik 2027-imi atorneqarsinnaalissaaq, taama Permagreen Grønland A/S tusagassiuutitigut nalunaaruteqarluni allappoq.
Permagreen Grønland A/S nalunaarpoq Dronning Ingridip Napparsimmavissuata Nuummiittup 6.500 kvadratmeterinik allilerneqarnissaanik isumaqatigiissusiorsimalluni. Taamaalilluni Aarsleff-selskabi napparsimasunut, ilaqutaasunut tarnimikkut nappaatilinnut sulisunullu pitsaanerusumik avatangiiseqalissaaq.
Sanaartornermik ingerlatsisoq tassaavoq Peqqissutsimut Naalakkersuisoqarfik. Arfininngornermi februaarip aallaqqaataani sanaartornermik suliaqartut nivariaqqaarput, Permagreen Grønland A/S-imilu pisortaanerup Jeppe Steffensenip aallartinnissani qilanaaraa:
- Nuannaarutigaara Permagreen Grønland A/S suliniummi annertuumi pingaaruteqartumilu tamatumani peqataanissamut periarfissinneqarmat. Sanaartornerup annertussusia sivisussusialu pissutigalugit patajaatsuusinnaavugut, isumaqatigiissutillu aamma praktikkerfinnik ilinniarfinnillu amerlanerusunik neqeroorfiginninnissamut periarfissiisinnaavugut.
Arfininngormat februaarip aallaqqaataani sanaartorneq aallartinneqarmat saamerliit tungaanniit takuneqarsinnaapput Ineqarnermut Attaveqarnermullu Naalakkersuisoq Hans Peter Poulsen, Peqqissutsimut Naalakkersuisoq Agathe Fontain kiisalu Permagreen Grønland A/S-imi pisortaaneq Jeppe Steffensen. Upernaap tungaanut pilersaarutit inaarutaasumik suliarineqassapput, naatsorsuutigineqarlunilu sulisut apriilip aallaqqaataani aallartissasut.
Assi: Permagreen Grønland A/S
Issittumi pissutsit immikkut ilisimasaqarfigigaat
Sanaartornermut tunngatillugu sanaartortitsisup akisussaaffilerneqarnera pisortap aamma tulluusimaarutigaa.
Upernaakkut ukiakkut, nunap qerinerani anorlerneranilu issittumi misilittakkavut iluaqutigisinnaavagut. Permagreen Grønland A/S taamaattumik aamma pilersaarusiornermut ataatsimiinnernut peqataasassaaq atortussanik aaqqiissutissanillu toqqaanermi ikiuutaajumalluni.
- Pisinnaasavut atorluartuaannarpavut, tassa sulisutta pikkorissut issittumi pissutsini pitsaasumik sanaartorsinnaanerat. Anguniagaraarput sanaartorneq patajaatsoq aserfallatsaaliorneqartariaqarpallaanngitsoq, Kalaallit Nunaanni innuttaasunut ukiorpassuarni tulliuttuni iluaqutaasinnaasoq, Jeppe Steffensen oqarpoq.
Sanaartorfik peqqinnissaqarfiup qalipaataanut sungaartumut qalipanneqassaaq napparsimmaviillu illuinut eqqaaniittunut tulluartumik ilusilersugaqassalluni.
Sanaartorneq 240 millionit koruuninik akeqassaaq, sanaartornerlu apriilip aallaqqaataani aallartissaaq. Sanaartorneq tamarmi 2027-mi naammassineqassaaq.
