Pilersitsivimmi piginnaanngorsarneq ilinniagaqalernissamut suliffittaarnissamullu iluaqutaasartoq

Hans-Peter Berthelsen (25) Pilersuisumi Paamiuni maanna suliffeqarpoq.

Suliffittaarnissani sioqqullugu Paamiuni Pilersitsiverpoq, tassanilu assigiinngitsorpassuarnik misileraalluni.

– Qalulerineq, ningittakkerineq, qassutit, qimissersuineq aalisarnermullu atortussanik sananeq ilikkarpakka. Svejserineq saviminernillu agiarneq misilippakka, angallatillu motoorii paasisaqarfigalugit. Sumiissusersiorneq, uumasut suuneri tamaasa sammivagut qaqugukkullu piniarneqarsinnaanerat aamma ilikkarlugit. Naatsiianik, ruuanik, agurkinik, tomatinik, gulerodinik purløginillu naatitsineq aamma misilipparput. Pilersitsivernerma nalaani nerisassanik suliaqarnermi eqqiluisaarnermut pikkorissaqataavunga, taamatuttaarlu imaani isumannaallisaanermut pikkorissaqataallunga, Hans-Peter Berthelsen oqarpoq. Taanna atuarfimmut tunniusimanerminut akissarsitinneqarpoq.

Pingaarneruvorli suliffeqalermat.

2021-25mut Naalakkersuisooqatigiit inuusuttunut 15-it 25-illu akornanni ukiulinnut ilinniagaqaratillu suliffeqanngitsunut atuarfinnik nioqqutissiornermut assingusunik pilersitsinissat isumaqatigiissutigigamikku tamanna anguniagaraat.

Taamani ataatsimiitsitaliamik pilersitsisoqarpoq, taakkulu 2023-mi nalunaarusiaq “Atuarfinnik nioqqutissiornermut assingusumik ingerlaasilinnik pilersitsisinnaaneq pillugu Naalakkersuisunut inassuteqaatit” saqqummiuppaat. Tamatuma kingorna Namminersorlutik Oqartussat kommunillu tallimat qanimut suleqatigiillutik Majoriap ataani Pilersitsivinnik pilersitsipput. Kommunillu illoqarfimmi sannaveqareersuni anguniakkamut tulluartumik namminneq toqqaapput.

Inuussutissarsiutinik ilinniarfinnik qanimut suleqateqarneq

Narsami, Paamiuni, Sisimiuni, Aasianni Ilulissanilu Pilersitsivimmik taaneqartartunik maanna peqarpoq. Suliniummi inuussutissarsiutigalugu ilinniarfeqarfinnik suleqateqarnermi Pilersitsivik Narsamiittoq Paamiuniittorlu siuttuupput.

Atuartut imarsiornermut tunngasunik ilinniartinneqartut

Pilersitsivik Paamiut tallimanik maanna sulisoqarpoq, taakku assigiinngitsunik ilinniartitsisuupput. Soorlu umiatsiat motooriinik iluarsaassinermik, svejserinermik aamma assassornermik. Aamma piniarnermut, ammerinermik, sakkussanillu sananermik ilinniartitsisoqartarpoq. Igaffimmi aqutsisumik atorfinitsisoqarnikuuvoq, taassuma atuartut nerisassiornermik atuartittarpai. Atuartut nerisassiornermi ikiuuttarput, amerlanertigut kalaallit pissarititaanik iganermik sammisaqarlutik saniatigullu eqqiluisaarnermut ilinniartinneqartarlutik.

Kiisalu Paamiuni Pilersitsivimmi aggustip aallaqqaataaniit allaffimmiumik atorfinitsitsisoqarpoq. Taassumap Imarsiornermik ilinniartut Pilersitsivimmilu atuartut, ilinniagaqarnissamut tunngasunik aqqutissiuuttarnissaat ilaatigut isumagissavaa, assigiinngitsunillu allanik suliaqartassalluni.

Angusaqarluartut

Pilersitsivik Paamiut ukioq nutaaq aatsaat aallartikkaluartoq ingerlallualereerpoq, maannamullu angusat naammagisimaarneqarlutik.

– Suleqatigiilluta ukiumut atuartitsissutissanik pilersaarusiortarpugut taamatuttaarlu sapaatit akunneri tamaasa ataatsimiilluta nalilersuinerit ingerlattarlugit. Suleqatigiit assigiinngitsutigut piginnaasagut atorlugit suleqatigiinnitsinni maanna killiffitsinnut angusagut naammaginarluinnarput, saniatigut sakkussanik tuniorartillutalu pikkorissartinneqartarnitsinni aamma atorluagassagut atorluarpagut, Kornelia Poulsen oqarpoq.

Pilersitsivik tunngaviusumik ukiup affaani ingerlanneqartarpoq. Misileraataammalli nalimmassarneqartuarluni.

– Ukioq nutaami aallartittut siulliit juunimi naammassipput. Aallartittussat tullii augustimi aallartissapput, taakku Kommuneqarfik Sermersuup illoqarfiinit assigiingitsuneersuupput. Inuusuttut 17-it Paamiuni suliniummut maannamut peqataareerput, Kornelia Poulsen oqarpoq.

Imarsiornermik ilinniarfiit qanimut suleqatigineqartut

Pilersitsivimmi piginnaanngorsareeraanni ilinniaqqinnissamut periarfissaqarpoq, aamma imarsiornermut tunngasuni suliffeqalertoqarsinnaalluni.

– Pilersitsivimmi naammassisut piginnaasaminnik uppernarsaateqalerlutillu pikkorissarnermi allagartartaarsimallutik, imarsiornerup tungaatigut ilikkagaqarsimallutik naammassisarnissaat anguniartarparput. Saniatigut suliffeqarfinni assigiinngitsuni misiliisarput, aamma sapaatit akunnera aalajangersimasumik sammisaqarfik ingerlattarpaat, ilaatigut ilinniarfigineqarsinnaasut suusinnaanerinik sammisaqartinneqartarlutik. Taavalu suliffeqarfinnut pulaarlutik aalisarnermut tunngasunik paasisassarsiorlutik misigisassarsiortarput, Kornelia Poulsen oqarpoq.

Narsami Pilersitsivimmi atuartut

Pilersitsivik Paamiuniittoq kisimi aallartilluanngilaq.

Narsami inuusuttut ilinnialernissaannut sulilernissaannulluunniit kajumissaarineq aamma aallunneqarpoq. Pilersitsivimmi sulinermut tunngasut ukkatarineqarput. Qisunnik sannavimmi immikkut ittumik sanaartornermik suliaqartoqarpoq. Tamatuma saniatigut iganermik nerisassiornermillu ilinniartitsisoqarpoq, nutaatullu imminut pilersorneq piniarnerlu sammineqassallutik.

– Sapaatip-akunnerata tulliani aallarteqqissaagut, kisianni atuartut kingulliit amigaatigaagut, Narsami Pilersitsivimmeersoq Josef Petersen oqarpoq. Kujataani illoqarfinnit arlalinneersut Pilersitsivimmi atuariartussasut aamma oqaatigaa.

Atuarneq qaammatini qulini sivisussuseqarpoq. Josef Petersen naapertorlugu inuusuttut Narsami Pilersitsivimmi naammassigunik Majoriamit neqeroorutigineqartartumi, efterskolemi, højskolemi, Narsami illoqarfinniluunniit nunaqarfinnilu allani suliffinni periarfissinneqassapput.

– Illoqarfimmi suliffeqarfiit aamma suleqatigilluarpagut, Josef Petersen oqarpoq.

Allaaserisaq una Isumaginninnermut, Suliffeqarnermut Nunamullu Namminermut Naalakkersuisoqarfimmit aningaasaliiffigineqarpoq.