Pituffimmi sakkutooqarfimmi qullersaq nuannarineqarluartoq isummersornini pissutigalugu soraarsitaasoq

Susannah Meyers, Pituffimmi sakkutooqarfimmi qullersaq, soraarsitaavoq.

Military.com-imi nutaarsiassiissutaasoq naapertorlugu præsidentip tulliata marsip 28-ani tikeraarnerata kingorna sakkutooqarfimmi sulisunut Amerikamiunut, Kalaallinut Canadamiunullu mailikkut allatani pissutigalugu soraarsinneqarpoq.

Suleqatigiinnissamut najoqqutassaq 

Susannah Meyersip politikki maanna atorneqartoq paasisinnaanagu, ernumassutilli Amerikami aqutsisut præsidentillu tulliata sakkutooqarfimmi tikeraarnerminni oqaatigisaat 

”Pituffimmi sakkutooqarfimmi pissutsinik ersersitsinngitsut,” aammalu ”qanoq ataasiakkaarlusi sunnertissimanersusi” sapaatit akunnerata naanera naallugu eqqarsaatigisimallugu mailimi Sermitsiap pissarsiarisimasaani allappoq. 

Allappoq „Uagut tassaavugut oqaluuserineqarneq ajortut", Pituffimmilu sakkutooqarfik nunat tamalaat isumannaallisaanikkut suliassanut tapersersuinermullu tunngatillugu qanoq suleqatigiinnissaannut maligassiuilluarnerpaasoq — USA-muinnaanngitsoq, aammali ullut tamaasa suleqatigisanut. 

Suleqateqarnerup nalinga 

Susannah Meyersip ilaatigut Kalaallit Nunaanni Politiit, Issittumi Sakkutooqarfik, Canadamiut sakkutooqarnikkut suleqatit aamma Inussumi, sakkutooqarfimmut kiffartuussinissamik isumaqatigiissuteqartumi, qallunaat kalaallillu sulisut suleqatigilluarnissaat pingaaruteqartoq præsidentip tullianut taassumalu angalaqataanut paasissutissiinermini erseqqissarsimallugu nangilluni allappoq.

Taakku tamarmik „suliaminnik ataqqinnittuullutillu ullullu tamaasa sakkutooqarfiup isumannaatsuunissaanik qulakkeerinninniarlutik, aamma innaallagissamik, imermik, attaveqaatinik sakkutooqarfiullu ingerlaannarnissaanik pisariaqartunik allanik isumaginninniartuupput". 

Sakkutooqarfimmi erfalasut tamarmik amuneqassasut 

Pisortap soraarsitaasimasup USA-mi sakkutuut silaannakkut illersornissamik suliaqartut USA-muinnaanngitsoq aammali USA-p suleqataanut tapersersuisartut sakkutooqarfimmiittut eqqaasillugit allakkani naggaserpai. “Sakkutooqarfimmi maani pisortaatillunga erfalasugut tamaasa tulluusimaarlutta ataatsimoorlutalu amussagigut neriorsuutigaara,” naggasiivoq.

Sakkutooqarfimmik aqutsisinnaanerata tatigineqannginnera pissutaasoq Amerikamiut sakkutooqarfiannit ilisimatitsissutigineqarpoq. Aamma sakkutooqarfinni pisortaasut pissuserissaarnermut najoqqutassianik qaffasinnerpaanik malinninnissaat naatsorsuutigineqarpoq, ingammik suliassaminnik suliaqarnerminni kinaassusersiortuunnginnissaat eqqarsaatigalugu.

 Pisortaq misigeqataasinnaasoq 

Susannah Myers sakkutooqarfimmi nuannarineqarluartoq, pikkorissoq, misigeqataasinnaasoq, qiimasoq aamma qanilaartoq siornatigut sulisimasut maannalu sulisut arlallit Sermitsiamut oqaluttuarput.

Susannah Meyersip sakkutooqarfimmeersut tamaasa naligalugit isiginiartarai aammalu sakkutuut sakkutuujunngitsullu soqutigilluinnarai kinaassutsiminik isertuussisoq oqaluttuarpoq. „Timmisartoq Danmarkimut uteraangat, uniformini atorlugit majuartarfiit eqqaanni nikuilluni sulisut tamaasa qutsavigisarpai.“

Pituffimmi sakkutooqarfimmi pisortaq nalinginnaasumik qaammatini aqqanilinni sakkutooqarfimmiittarpoq, Susannah Meyersili sakkutooqarfimmut suliartoqqissimagami ukiup aappassaa sakkutooqarfimmiileruttorluni soraarsitaavoq. Pisortaq nutaaq qaqugu atorfinitsinneqassanersoq ilisimaneqanngilaq.