Oqallinneq akunnerni arfineq-pingasuni minutsinilu 25-ni
ingerlasimavoq.
Qallunaat politikerit oqaasissaaleqinngitsut ilaatigut
soraarninngorneq, Gaza, Ukraine nunanit allaneersut Jyllandillu kitaani amaqqut
iternga tikillugu eqqartorsimavaat.
Oqallinneq akunnerni arfineq-pingasuni minutsinilu 25-ni
ingerlasimavoq.
Qallunaat politikerit oqaasissaaleqinngitsut ilaatigut
soraarninngorneq, Gaza, Ukraine nunanit allaneersut Jyllandillu kitaani amaqqut
iternga tikillugu eqqartorsimavaat.
Taava Aki-Matilda Høegh-Dam (N) oqaaseqartussanngorami
qulequtaq kikkut tamarmik paasisinnaallugulu isummerfigisinnaasaat
oqaluuseriumavaa: Punnit akii.
Enhedlistenimi siulittaasoq, Pelle Dragsted, ukiuni
kingullerni aningaasat naleerukkiartupiloorneranni qallunaat ilungersunartumik
atugaqarnerat pillugu oqaluttarfimmiinnermini eqqartuisimasoq, saaffigaa.
- Punneq poortaq ataaseq ullumikkut 30 koruunit angullugit
akeqartoq, inuillu ulluinnarni angummanniapiloortut oqarputit. Punneq poortaq
angineq Nuummi 60 koruuneqarsinnaasoq sineriammi suli akisunerusinnaavoq,
Aki-Matilda Høegh-Dam oqarpoq.
Kalaallit Nunaanni atugarissaarneq qallunaat
atugarissaarnerannut assingusariaqartoq taamaattoqarunanngitsorli, akillu
qaffakkiartuinnarnerini innuttaasut eqqugaasut suli tatineqarnerusimassasut Pelle
Dragstedip akissummini nassuerutigaa.
- Kalaallit Nunaannili akilersuisarneq pillugu ilisimasakka
naammanngillat. Assartuinermut aningaasartuutit qaffasinnerpat
iluanaarnialluunniit atorluaanerpat. Naluara. Taamaattoqassappat akiorniarlugu
Kalaallit Nunaanni oqartussat tapersersussavagut, taanna oqarpoq.
Sulisartut atugassarititaat
Punneq 60 koruunilik Facebookimi eqqartorneqangaatsiartoq
nioqqutissallu allat ulluinnarni niuerniartarnermi akissanut tatisisut AG-mi
sapaatip-akunnera kingulleq saqqummersumi allaaseraarput. Assersuutigalugu
yoghurti liiteri ataaseq sineriammi 40 koruuneqarlunilu immussuaq mozzarella
aserortigaq 58,95 koruuneqarpoq.
Upernavimmi ulluinnarni illaqutariinnut meerartalinnnut
“inuuniarneq akisoorujussuanngorsimasoq” arnaq AG-mut oqaluttuarpoq.
Aki-Matilda Høegh-Damip Pelle Dragstedimik
oqaloqateqarnermini oqaatiginiakkamini akinik qaffaanerit Kalaallit Nunaanni
aningaasarsiaqartut nalinginnaasut tamarmik inuunerminni atugassarititaannut
qanoq ajorseriaataasarnersut tikkuarpaa.
- Sulisartut ulluinnarni nioqqutissanut akissaqalissappata
qanoq iliussaagut? aperivoq.
- Tamanna imaaliallaannaq akineqarsinnaanngilaq. Ilaali
akileraartarnermut politikkimut tunngassuteqarpoq, pissarsiassat qanoq agguaateqqinneqartarnersut,
Pelle Dragsted akillunilu suliffeqarfinnut aalajangersimasunut
inuussustissarsiornermi tapiissuteqarnermi isumaqatigiissutit kiisalu
aningaasarsiat sulinermilu atugassarititaasut naapertuuttut pillugit
piumasaqaateqartoqartariaqartoq aamma innersuutigaa.
Akit allanngorartut
Aningaasat naleerukkiartornerat Kalaallit Nunaanniinnat
oqaluuserineqarnani aamma Danmarkimi oqaluuserineqarmat punnerit akiisa
qaffannerat oqaluuserineqaqalunilu ingammik nersussuup neqaasa aserortikkat
akiisa qaffannerat eqqartorneqangaatsiarpoq.
Taamaammat AG-mit Nuummi, Københavnimi Tórshavnimilu
pisiniarfinni punnerit pillugit piseqqusaarutit misissorneqarput: Danmarkimi
akikilliliisoqartillugu Kærgården ataaseq 12 koruuneqarlunilu
akikilliliisoqartinnagu 32 koruuneqartarpoq, taamatullu akeqakkajuppoq.
Tórshavnimi akikillillugu 25 koruuneqarpoq (200 gram)
Nuummilu atuisoq eqqummaarissoq punnernik Kærgårdeninik poortanik marlunnik
akikillillugit 45 koruunilinnik iluatsitsisinnaasarpoq, tassa poortamut
ataatsimut (200 gram) 22.50 koruunit. Nalinginnaasumik akia
qaffasinnerungaatsiarsinnaavoq.
Aki-Matilda Høegh-Damip oqaaseqarluni ilanngussaqarnermini
unnussuarmut ingerlanneqartumi Kalaallit Nunaanni inuuniarnikkut atukkat
ilungersunartut eqqaaqqippai.
- Anaanaq nerisassarsissanerluni nangersissanerluniluunniit
aalajangertariaqarsinnaavoq, oqarpoq, nioqqutissallu tikisinneqartartut
amerlanersaat Danmarkikkooqqaartartut Aki-Matilda naapertorlugu nioqqutissanik
pisariaqanngitsumik akitsuinermik kinguneqartarnerat ajornartorsiutaasoq
uteqqippaa.
Victoria Velasquezip Enhedslistenimeersup paasissutissaq
taanna tupaallaatigerpasippaa.
- Akit taama qaffasitsigitillugit innuttaasut inuuneri
eqqorneqarput. Tamanna toqqissisimanermut sunniuteqassaaq. Akinut tunngatillugu
Danmarkimit qanoq iliorsinnaavugut, Velasquez oqarpoq.
- Inuussutissalerinermut Aqutsisoqarfiup Nuummi allaffiata
maanna ammarnissaa statsministeri suleqatigalugu sulissutigingaatsiarnikuuara. Taamaaliornikkut
nioqqutissat nunanit allaneersut eqqunneqarsinnaalernissaannut
periarfissaqarnerulerutta nunatsinni akit apparsinnaapput, Aki-Matilda akivoq.
Taanna naapertorlugu Kalaallit Nunaata Danmarkimut
aningaasartuutaannaaneranik eqqunngitsumik paasinnittoqarunnaarnissaanut
piffissanngorpoq.
- Tamanna qangali ilisimavarput. Danmarkip kalaallit
pingaartittariaqarpai, oqarpoq.
“Aalassangaatsiarneq”
Høegh-Dam oqaaseqarluni ilanngussamini nammineerneq,
Inatsisartunilu partiit tamangajammik anguniagaralugu nalunaarutigisimagaat,
aamma eqqartorpaa. “Nunani tamalaani aalassangaatsiarneq” Kalaallit Nunaanni
allannguinermik aamma pilersitsisinnaasoraa.
- Statsministeri Kalaallit Nunaanni aningaasaliinerunissamut
aalajangiinissaminut piareersimalluni ullumi oqarpoq. Tamanna nuannaarutigaara.
Taamaaliornissaanulli nunarsuarmi aalassattoqaqqaartariaqarnera ajuusaarnarpoq,
Aki-Matilda oqarpoq.
Politikerit qallunaat Kalaallit Nunaannik
nuannarinnilluartuullutik, nuannarinninneralli aningaasanik tapiiuarnikkut
nunap anguniakkaminik angunninnissaanut naammanngitsoq eqqumiiginerarpaa.
- Sooq naalagaaffinngornissatsinnut ikiunngilisigut? Inersuarmi
aperigami kalaallit Amerikamioorusunnatillu qallunaajorusunngitsut,
kalaaliorusuttulli naqissuserpaa.
Aki-Matilda naapertorlugu qallunaat Kalaallit Nunaannik
nuannarinninnerat paasiuminnaassinnaavoq:
- Kalaallit Nunaannut asanninnermut imaluunniit
nunarujussuarmut piginnittuunermut tunngava? taanna aperivoq.
Nuna namminiissanersoq Kalaallit Nunaanni innuttaasut
namminneq aalajangigassarigaat partiit Folketingimi ilaasortaatitaqartut
amerlanerpaat oqaatigisimagaat inersuarmiit akipput.
