Qaannamik unammersuarnerit aallartinneqarput: Qajaq kuultimit naleqarneruvoq

Qaannamik pissartanngorniunnerit Sisimiuni aallartipput.

Sissami unammisussat Tiniteqilaameersut Ilulissaneersullu takussaanngillat, sulimi taakku Sisimiunut tikinngillat.

Peqataasussalli arlallit tikerareerput, peqataasussalli 33-it amigaataapput. Tiniteqilaamit arfinillit, Ilulissaneersullu 27-it suli tikinngillat.

Taamaakkaluartoq ulloq ullaakkorsioqatigiinnermik Taseralimmi aallarnerneqarpoq. Kingorna pisoqatigiillutik oqaluffiliarput.

Oqaluffimmeereeramik Paaraarsummi ammaanersiorput. Tassanilu isiginnaariarpassuit takussaapput.

Meeqqat unamminissaannut piareersartoqartoq Peqatigiiffik Qajaq Sisimiuniit oqalugiarneq aallarnerneqarpoq. Qaannat Kattuffiat kiisalu Qeqqata Kommuniani borgmesteri Malik Berthelsen oqalugiarput.

Unammersuarnermi kuultimik, sølvimik bronzimillu pinnattoqarsinnaavoq, kisiannili qajaq kuultiusumit naleqarnerusoq, Johanne B. Tobiassen Qaannat Kattuffiannit oqarpoq:

- Qajaannaannginnami aamma unammissutaannaannginnami. Isumalerujussuugami. Isumaa aamma uaniikkami inuup imminut napatissinnaaneranut tunngaviusimavoq, suleqatigiinnikkut. Angutaannaanngilaq suliaqarsimasoq, aamma arnaq suliaqarsimavoq. Siorna illorujussuarmi najugaqarlutik suleqatigiittarput. 

- Massakkut peqatigiiffikkaarluta ingerlagaluarluta ingerlatitseqqiivugut. Ammerisartut allatut peqatigiiffeqarput, qajartortartut immikkut peqatigiiffeqarput. Tamatta immikkoorpugut. Taamaattumik ataatsimoorsinnaaneq siulitta inississimasaat, illu ataaseq ingerlatitsisinnaasoq inuunermik. Isumaa annerugami, Johanne B. Tobiassen oqalugiareerluni Sermitsiamut oqarpoq. 

Peqatigiiffik Qajaq ukiunik 40-nngortorsiorluni ullorsiorpoq. Tassungalu tunngatillugu unammersuarneq Qeqqata Kommuniata borgmesteriata pisortatigoortumik ammarpaa:

- Qajaq taama mikitigisunnguugaluarluni siulitta inuussutissarsiorsinnaaneranut qanoq pingaaruteqartiginera eqqarsaatigalugu isumaqarpunga siulitta qanoq silatutigisimanerat assorujssuaq tupinnarlunilu ajasoornartoq, borgmesteri oqarpoq.

Taassuma angajoqqaat peqatigiiffillu qaannap ingerlateqqinnerannut qujaffigalugit nersualaariarlugit unammersuarneq aammarpaa.

Ullumikkumut pilersaarutit malillugit naatsumut parrunnerit sisamaniit 59-inut ukiulinnit unammissutigineqassapput, unnukkorsiornissap tungaanut.

Unammersuarnerit Peqatigiiffik Qajaq Sisimiut Facebookimi quppernerani malinnaaffigisinnaavat.