Qallunaaq ilusilersuisartoq MAGA-nik nasartaatinik Sisimiuni agguaasoq
Sisimiut qallunaamit ilusilersuisartumit, aallarnisaasartumit isumaliutersortartumillu Jens Martin Skibstedimit tikeraarneqarpoq, taannalu illoqarfimmi innuttaasunut nalinginnaanngitsumik agguaavoq. Nasartaatit akeqanngitsut taassuma ilanilu agguaappaat, kisianni ilisimaneqarluartumik "Make America Great Again"-imik qulequtaqaratik nasartaatini allassimavoq "Make America Go Away".
Assi: Tôrtia Reimer-Johansen
Angut qallunaaq Sisimiuni nasartaatinik aappaluttunik MAGA-nik agguaasoq takussaavoq.
Jens Martin Skibsted Sermitsiamut oqaluttuarpoq præsidentip ernera nuummut tikeraarmat uumitsassimalluni, taamaattumillu tassunga qisuariarneruvoq.
- Uumitsatsippaanga. Sorusunnerluni nammineq paasiniaraanni allat akuliuttussaanngillat. Paasivara aamma qallunaanut tusarnaartoqassanngitsoq, kisianni isumaqanngilaq pissaanilinnut tusarnaartoqasssoq, Jens Martin Skibsted Sermitsiamut oqarpoq.
Quujasaarpalaartumik oqariartuut imaluunniit politikkikkut mamarlersaat?
Jens Martin Skibsted oqaluttuarpoq neriuutigalugu Sisimiuni innuttaasut oqariartuut ajunngitsumik tigussagaat, ingasattumik malersuinertut isiginagu.
Nasartaatit aappaluttut illoqarfimmi takussaalereerput.
Assi: Tôrtia Reimer-Johansen
- Neriuppunga Sisimiuni innuttaasut nuannersumik tigussagaat, pimooruppallaarnagulu. Neriuppunga inuit narrujuummissutigissanngikkaat.
Nuummiit Sisimiunut timmisartornermini Amerikamiut takornariat arlallit naapippai, taakkualu oqariartuut mamiatsaatigisimagaat, taassuma oqaluttuaraa.
- Kamassaatigilerpaat isumaqaramik sianiitsuliornerusoq.
Ulluni aggersuni Skibsted Sisimiuni takuneqarsinnaassaaq, tassanilu MAGA-nasartaatinik innuttaasunut agguaaniarpoq.
