Qatanngunni timmisartup Kangerlussuarmi nakkarnerani ajunaarnikoq eqqaaniaraa

Mala Tobiassen timmisartup Kangerlussuarmi 1976-imi aggustip 28-ani nakkarnerani ajunaartunut eqqaassutissap eqqaani naneruusiivoq. Taassuma qatanngutaa Karen Tobiassen kalaallillu allat sisamat taamanikkut ajunaarput. Kalaallit taakkua Qaanaamiit Danmarkimut efterskoleriarlutik timmisartortillutik taamanikkut ajunaarput.

Timmisartup Kangerlussuarmi nakkarneranik taamanikkut takunnittut annilaarujussuarsimapput. Taamanikkut tarnikkut ikiorsiisoqartanngitsoq, timmisartup nakkarneranik takunnittut ilaat oqarpoq.

Sisamat annattut

Timmisartup Lochheed C-141 Starlifteriusup New Jerseymeersuusullu Kangerlussuarmi taamanikkut nakkarnera aquttup mikkiartornermi kukkuluttorneranik pissuteqarpoq. Timmisartoq nakkartoq nungulluni ikuallassimasoq, timmisartumik ajunaarneq pillugu nalunaarusiami allassimallunilu Lars Marcussenip nittartakkami Flickrimi paasissutissiissutigaa.

Timmisartoq taanna 27-nik, tassa arfineq-pingasunik inuttaqarluni 19-inillu ilaasoqarluni taamanikkut nakkarpoq. Issimasuni 20-t timmisartup nakkareernerani ikuallagussaallutik ajunaarput, pingasullu uutiternertik toqqutigalugu. Issimasuni sisamat annapput, taakkunannga ataaseq aquttuuvoq amerikamiu, marluk kalaaliupput ataaserlu sanasuulluni qallunaaq. Kalaallit taamanikkut ajunaartut aqqi eqqaassutissami allassimapput:

Tukumek Kaerngak,

Ekilana Uvdloriak

Inge Kiviok

Lene Suersak

Karen Tobiassen