Qimmiaraq arnaaniit siusippallaamik peersinnagu
Qimmiaqqat qitsuaqqallu arnaaniit siusippallaamik peersikkaanni kingunerlussinnaavoq, taamaattumik Kalaallit Nunaanni Uumasunut Nakorsaqarfimmi Inuussutissalerinermullu Oqartussaaffiup innersussuutigaa uumasut utoqqaanerulaalernissaannut utaqqisoqassasoq.
Assiliisoq: Tôrtia Reimer-Johansen
Qimmiaqqat qitsuaqqalluunniit siusinnerusukkut arnaminnit peersinneqaraangamik timimikkut tarnimikkullu nalinginnaasumik ineriartunngitsooriataarsinnaasarput taamaattumillu ajornartorsiuteqartumik uumasuutitaarnissaq qaninnerulersarpoq.
- Kalaallit Nunaanni Uumasunut Nakorsaqarfimmi Inuussutissalerinermullu Oqartussaaffimmi qimmiaqqanik imaluunniit qitsuaqqanik siusippallaakkut arnaannit tigullugit piginnittuulersunut tunniussisarnernut suliassanik akuttunngitsumik suliaqartoqartarpoq. Ilaatigut qimmiaqqat sapaatit akunnerinik marlunnik - pingasunik utoqqaassusillit Facebookikkut tuniniarneqartut takusarpavut.
Qimmiaqqat qitsuaqqallu arnaaniit peersiaarpallaaraanni kinguneqarnerlussinnaavoq, taamaattumik utaqqilaarnissaq pisariaqarpoq:
- Periutsit atuuttut malillugit qimmiaqqat sapaatit akunnerinik arfineq-pingasunik utoqqaassuseqalersinnagit arnaminnit peersinneqassanngillat. Qitsuaqqanut tunngatillugu ikinnerpaamik sapaatit akunnerinik aqqaneq-marlunnik utoqqaassuseqalersinnagit arnaminnit peersinneqassanngillat.
- Qimmiaqqat qitsuaqqalluunniit siusinnerusukkut arnaminnit peersinneqaraangamik timimikkut tarnimikkullu nalinginnaasumik ineriartunngitsooriataarsinnaasarput taamaattumillu ajornartorsiuteqartumik uumasuutitaarnissaq qaninnerulersarpoq.
Suliassanngortitsisoqarsinnaasoq
Malittarisassat unioqqutinneqarpata uumasumik piginnittumut imaluunniit uumasumik nakkutiginnittumut suliassanngortitsisoqarsinnaavoq.
- Uumasuummik illersorneqarsinnaasumik paarsisoqarsinnaanngippat uumasumut akisussaaffik allamut tunniunneqassaaq. Nuummi Qaqortumillu uumasunik illersuineq pillugu suleqatigiiffik Dyrenes Venner nassaassaavoq, taannalu pisariaqartitsisoqarpat ikiuussinnaavoq. Allatut iliortoqarniarpat uumasut illersorneqarsinnaasumik toqunnissaat isumagineqassaaq.
Qimmitaarusukkaanni qitsuutitaarusukkaanniluunniit akuersissummik pissarsinissaq siunertaralugu kommunimut saaffiginnittoqassaaq. Qimmit perlerornermut, qimmit nappaataannut kiisalu parvovirusimut, qitsuillu perlerornermut inatsisitigut pisussaaffiusumik akiuussusersorneqartussaapput.
Kiisalu qimmit kinaanerannut normulerlugit chipimik nalunaaqutserneqassapput nalunaarsorneqarlutillu, nunalu tamakkerlugu paasissutissanut toqqorsivimmi akiuussusersorsimanermut nalunaarsorneqassallutik, tamannalu aqqutigalugu qimmerisat tammarsimappat takoqqinnissaa anguneqassaaq.
