Qineqqusaarneq
naammassiartorpoq. Allaaserisaq una saqqummerpat qinersinissamut sapaatit akunneri
marluk sinnilaarlugit qaangiuppata pissaaq, illuatungeriillu sukakkiartorput.
Mamakujunnik nakkaatitsineq annertusiartorpoq.
Qineqqusaarneq
naammassiartorpoq. Allaaserisaq una saqqummerpat qinersinissamut sapaatit akunneri
marluk sinnilaarlugit qaangiuppata pissaaq, illuatungeriillu sukakkiartorput.
Mamakujunnik nakkaatitsineq annertusiartorpoq.
Tupaallannartoqarpali
– sammisamik qineqqusaartorluunniit qineqqusaarnerup ingerlaneranik
allannguisinnaasumik?
Sermitsiap
oqallitsitsisartuata, Arnaq Nielsenip qineqqusaarneq qanimut malinnaavigaa,
marsillu aqqarnani qinersinissap tungaanut soqutiginarnerpaat,
equnganerpaalluunniit AG-mut oqaluttuarai.
Qinigassanngortittut
200-nit amerlanerusut Inatsisartuni inissat 31-t arsaappaat, SIK-meersullu Jess
G. Berthelsenip KNAPK-meersullu Nikkulaat Jeremiassenip qinigassaanerat Arnaq
Nielsenip maluginiarpaa.
-
Siulittaasut marluk qinigassanngortinnerat maluginiarnarpoq. Jess G. Berthelsen
kattuffimmit tuusintilikkaanit ilaasortalimminngaanneerpoq. Ukiorpassuarni
siulittaasuusimavoq ilisarisimaneqarluarlunilu, Arnaq Nielsen oqarpoq.
-
Nittartakkatigut isummanik siammarterisartut arlallit, tassani arnat
inuusunnerusut malinnaasorpassuallit, qinigassanngortinnerat aamma
maluginiarpara. Tik-Tokimi 2021-mi qinersinermi kingullermi
takusimanngisatsinnik oqariartortarnermut pikkorissorujussuupput. Ataatsimut
isigalugu partiit videonik saqqummiussilluartarnissartik maannakkut
eqqummaariffigisupilussuugaat malunnarpoq. Tamanna qanoq qinersisinut
sunniuteqarsinnaanersoq takussallugu soqutiginarpoq, Arnaq Nielsen nangilluni
oqarpoq.
Pakatsisut
DR-ip
orsugiassiorfik pillugu piviusulersaarusiaata qineqqusaarneq sakkortuumik
sunneraa Arnaq Nielsenip sapaatip
akunnerani kingullermi AG-mi oqaloqateqarnermini oqaatigaa. Kingornali
piviusulersaarut peerneqarpoq.
- Tamanna
qineqqusaartunut qinersisaartunullu qanoq sunniuteqarpa?
- Amerlasuut
tamanna pakatsissutigigaat maluginiarpara. Tusagassiortutut piviusulersaarutip
peerneqarnissaanut patsisissat annertoorujussuusussaanerat nalunngilarput.
Taamaaliorneq nalinginnaasuunngilaq.
-
Sammisaq taanna qineqqusaarnermi sunniutikinnerulissava?
-
Assigiinngitsorpassuit sammineqarput, aamma nunasiaataasimaneq kiisalu
Kalaallit Nunaata Danmarkillu akornanni aningaasaqarnikkut atassuteqatigiinneq,
Arnaq akivoq, taassumalu piviusulersaarutip puiuinnarneqarunnanngitsoq
nalilerpaa.
-
Imaassinnaavoq Danmarkimi inuit ilaat ingerlaqqiinnarnernissamik isumaliortut.
Kalaallit Nunaatali Danmarkip atugarissaarnerulerneranut akileeqataanerat maani
oqaluuserineqaqaat, tassa piviusulersaarutip toqqammavia. Inuit ilaasa
piviusulersaarutip peerneqarnera nikalluallaatigigunarpaat. Akerlianilli
inuusunnerusut sammisamik paasissutissinneqarput. Tamanna
qaammaasaqarnerulernermik kinguneqarpoq – tassa Kalaallit Nunaat Danmarkimut
aningaasartuutaannaanngitsoq. Tamanna nukissaqarnerulersitsivoq.
-
Taamaalilluni qineqqusaarnermut suli sunniuteqarsinnaavoq?
- Partiit
ilaasa matuma ilaa sammissallugu toqqarpaat. Kalaallit Nunaat
naalagaaffeqatigiinni inissaqarnerullunilu pissarsiaqarnerusariaqartoq partiit
tamarmik isumaqatigiissutigaat.
Suiaassutsit
akersuunnerat
Nunarsuaq
tamakkerlugu arnat ulluat qanilliartorpoq. Qinersinissamut ullut
pingasuinnanngorpata nalliutissaaq. Tassungalu atatillugu naligiissitaaneq
pillugu Arnaq Nielsen aamma aperaarput – suiaassutsit assigiinngitsut taakkulu
politikimi sinniisoqarnerat. Inatsit Inatsisartunit akuerineqartoq malillugu
suiaassuseq apeqqutaatinnagu pisinnaatitaaffiit periarfissallu assigiit
qularnaarneqartussaapput.
Inatsisartuni
atorunnaartuni angutit 21-upput arnallu quliullutik.
Naalakkersuisuni
angutit arfineq-marluupput arnallu pingasuullutik.
Maannakkut
partiini Inatsisartuni sinniisuutitaqartuni siulittaasut tamarmik
angutaapput.
- Sooruna
taama equngasoqartoq?
-
Politikerit illoqarfinnit allaanerusut Inatsisartunut ataatsimiigiarnissamut
ungasissumut angalasussaanerata nassuiaataanera
isiginngitsuusaarneqarsinnaanngilaq. Upernavimmit, Tasiilamit il.il. Nunani
allani atugarineqartunit allaanerullutik ilaquttatik qimassimanerusussaavaat.
Taamaattoqarneratalu sassarnissamut tunuarsimaarneruneq
kingunerisarunarpaa.
-
Qinersisartut naligiissitaaneq pingaartippaat?
- Ilaat
taamaapput. Arnat nittartakkatigut isummanik siammarterisartut allaanerusumik
sunniuteqarnissaat takussallugu pissanganarpoq. Suiaassutsit akornanni
politikimi naligiissitaaneq siusinnerusukkut eqqartorneqartarpoq,
Inatsisartunilu sulinermi pissutsinik allannguineq meeralinnut oqinnerusumik
atugassaqartitsilissaaq, Arnaq Nielsen ilassusiivoq.
Qinigassanngortittut
suiaassutsikkut agguataarsimanerat misissorpaa, misissuinermilu
qinigassanngortittunit 213-init arnat 63-iunerat angutillu 150-iunerat
paasivaa. Taamatuttaaq 2021-mi qinersinermut sanillersuussivoq. Tassani
qinigassanngortittunit 189-init arnat 56-iunerat angutillu 133-unerat
paasinarsivoq – 2018-imilu qinigassanngortittunit 230-nit arnat 73-iupput.
Qasukkarsimaanarlunilu
unammillernartoq
Qineqqusaarnerit
sapaatit akunnerisa pingajuanni sammisat annertunerusut tigussaannginnerusullu,
soorlu nunanut allanut politiki Danmarkimullu atassuteqarneq
tunuarsimaarnerulernerat maluginiarpaa, taarsiullugulu ulluinnarni atukkat
sammineqarnerulerput:
- Maani
inuuniarneq akisunerulersimavoq. Inuit tamanna soqutigilluinnarpaat.
Politikerilli tamanna allanngortinniarlugu iliuuseqarnersut imminnut aperipput?
Akimmi nassuiaatissartaasa ilaat avataani pisunit sunnerneqartarpoq.
-
Pinngitsoornani soraarnerussutisiaqalernissamut katersisussaatitaaneq initusoq
aamma maluginiarpara. Tamanna inuit soqutigilluinnarpaat, Arnaq ilassusiivoq.
Sapaatip
akunnerani qaangiuttumi qinersinermi podcastini ulapputigaa. Partiini siuttut
nikittaatsillugit pisuttuaqatigisarpai, tassanilu assiginngitsorpassuit
oqaluuserisarpaat – aamma sammisat qineqqusaarnerni qaqinneqarneq ajortut.
Sapaatip
akunnerata siuliani partiit siuttui sisamat peqataapput:
- Iluseq
iluarisimaarlugu oqaatigaat. Persuarsiornannginneruvoq. Sungiuttariaqarnerali
aamma isumaqatigiissutigaarput. Periuseq nutaajuvoq siornatigut
atorneqarsimanngitsoq, Arnaq nassuiaavoq. Politikerit periutsimik iluarisimaarinnillutik oqaaseqarnerisa nalinginnaasumik
politikerinit apersuisarnermit allaanerusumik periuseqarnissap
isumassarsiatsialaaneranik upperinnilersippaa. Tamanna qasukkarsimaarnerunermik
kinguneqartarpoq, taamaalillunilu apeqqutit nalinginnaasumit
apeqqutigineqartartunit allaanerusut aamma qaqilerneqartarput.
-
Unammillernartumik misilittarneqarneq - apersukkannut uannullu. Nuannerporli,
Arnaq Nielsen oqarpoq.
