Qujaukitsoq partiimut ilaasortanngorpoq

Nunatta Qitornaani siulittaasuusimasoq Siumumilu ilaasortaasimasoq Vittus Qujaukitsoq Inatsisartunut qinersisoqartussanngorneranut atatillugu Naleqqami ilaasortanngorpoq.

Qujaukitsoq partiimut ilaasortaaffeqarani qinigassanngortikkusulluni siusinnerusukkut nalunaarpoq.

Politikerili Naleqqap ilisarnaataa atorlugu Facebookimut marlunngornermi ikkussivoq, Sermitsiamullu eqqarsaatigilluareerlugu partiimut ilaasortanngorsimalluni oqaatigalugu:

- Naleqqap anguniagai qineqqusaarutaalu uanga anguniakkannut eqqaanarput, taamaattumik aalajangernissaq ajornanngitsuuvoq, Qujaukitsoq oqarpoq.

Namminiilivinnissaq anguniakkatut eqqaavaa:

- Nammineq aalajangiisinnaassuseqarnissamik kissaateqarneq, nunamut pisuussutinullu nammineq aalajangiisinnaaneruneq, Kalaallit Nunaata namminiilivinnissaanut sakkussat suut atorneqassanersut, taamaalillunilu namminiilivinnissamik kissaateqarnermi innuttaasut qanoq sukkanerusumik isumaqataalersinneqarsinnanersut. Tamanna nammineq piunnanngilaq. Inuiaqatigiinnik sullissisunik ineriartortitsisariaqarpugut, imminut pilersornerulerluta innuttaasullu piginnaasaqarnerulerluta. Danmarkimit avissaaginnarata kisiannili tamatta namminiilivinnerulerluta, oqarpoq.

Vittus Qujaukitsup saniatigut politikerit nuimasut marluk, Siumumi ilaasortaasimasut Aki-Matilda Høegh-Dam aamma Kuno Fencker, marsip aqqarngani qinersinissami Naleqqamit qinigassanngortinniarlutik nalunaarput.