RAL kinguaattoorpoq: Umiarsuaq imarpikkoortaat maskiinaajartoq
Umiarsuaq pajuttaat Dettifoss, maannakkut DET 525-mik Reykjavikimiit Nuummut angalasoq, Islandimiit aallarnermi kingorna ulloq ataaseq qaangiuttoq maskiinaminik ajoquteqalerpoq. Angalanissamut pilersaarutit taamaattumik allannguuteqarput.
Assi: Royal Arctic Line
Royal Arctic Linep nittartakkakkut paasissutissiissutigaa umiarsuaq imarpikkoortaat Dettifossip angalanerminut DET 525-mut atatillugu Reykjavikimit Nuummut ulloq unnuarlu ingerlaareerluni maskiinaajartoq.
Dettifoss maannakkorpiaq Reykjavkimut kalinneqarpoq, sapaammilu juulip 13-iani tikissangatinneqarluni. Maskiinamik iluarsaassineq nalunaaquttap akunneri 48-t missaannik sivisussuseqartussatut missiliorpaat.
Tamatuma kingunerisaanik Nuuk sapaatit akunneranni 28-mi imarpikkoortaammit aqqusaarneqassanngilaq.
Assartugassat suliarineri
Usit Reykjavikimi niuneqassapput Tukuma Arcticalu ataasinngorpat aqqusaarpat usineqassallutik. Umiarsuullu Nuummut sisamanngornermi juulip 17-iani tikinnissaa naatsorsuutigineqarpoq.
Tamatuma saniatigut avammut nioqqutinik nassiussat pingaarnersiorneqartut Silver Marymik Reykjavikimut assartorneqassasut, Royal Arctic Linep paasissutissiissutigaa.
Tassanngaanniillu Dettifossimik Europamut pilersaarutit malillugit assartoqqinneqarnissaat naatsorsuutigineqarluni.
- Taamatut pisoqarnerata sullitatsinnut pisarissersuutaasinnaanera ajuusaarutigaarput, aamma paasinninnissinnut naammagittarsinnaanissinnullu qujavugut, Royal Arctic Line paasissutissiilluni naggasiivoq.
Umiarsuup assartuutip kinguaattoornera pissutigalugu Brugsenip pisiniartartuni kaammattorpai amigaatit kisiisa pisiareqqullugit.
