Sanikannianit isigalugu: Milliardikkaat

Kuulti qaqortoq pillugu piviusulersaarut takutinneqaqqammiinnartoq inuit silatuut apeqquserpaat 400 milliardit, Danmarkip pisuunnguutigisimasai, ilumut eqqortuunersut.

Tamanna ilisimasaqarfiginerullugu oqaatigissanngilara, kisianni pisuussutit nalitoorujussuit nunasiaanerup nalaani kingornatigullu Danmarkimut assartorneqartarsimasut apeqqusernianngilakka.

Tamanna maani akaarinninnani nillianermik pilersitsivoq, kamaammernerit sakkortusigaluttuinnarlutik.

Taamaattoqartillugu eqqissisimaniarnissaq silatusaarnerussaaq. Silap pissusiani inuuffigisatsinni eqqissisimaniarnissaq ajornanngilaq, qineqqusaarnermili tamanna naatsorsuutigisinnaanngilarput. Nipituuliornerit qinngarsuinerillu tusarnaartassavavut, Danmark ajortuliortutut nittarsaanneqarluni. Iliuuseqarniartartunut oqaaseqartartutut imminut suaarutigisartutut tamanna qilanaarinngilarput.

Naggueqatigiittoqqat attaveqaqatigiittarnerattut attaveqaqatigiippugut.

Piffissat nutaat

Oqaaseq ullutsinni atorneqartartoq pingaaruteqarluinnartoq ataqqinartorlu tassaavoq demokrati. Oqaaseq grækerit oqaasiinit pisoqqanit „demos“-imit isumaqartumit „inuiaat“ aamma „kratos“-imit „pissaanermik“ isumaqartumit naggueqarpoq. Tassa “inuiaat pissaanillit”, pissaaneq “inuiaat pissaanerattut” isumaqartillugu. Oqaaseq nuannerluinnartoq.

Oqaatigisinnaavaralu inuiaat pissaanerata nipaa inoqatinut attaveqaqatigiittarfitsigut nipitunerulersimammat. Aammami Nunatsinni Facebooki atugaasorujussuuvoq.

Qangaanerusoq inoqatinut attaveqaqatigiittarfiit saqqummeqqaarmata ingerlaannartumik eqqarsarpunga, oqallinnerni isummersornernilu inuinnaat naalakkersueqataanerannut iluaqutaasorujussuussasoq. Ullutsinni eqqarsarpunga: Tamanna ingasagisassaanngilaq!

KNR-ip Nuummi Ilisimatusarfimmi ilinniartut arlallit februaarip arfernanni oqaloqatigai. Ilinniartut politikimik soqutigisaqarpianngitsut, Facebookikkullu pissutsinut malinnaalluarsinnaallutik oqaatigalugu. Kinguaariit taakku aviisinik pisinissaminnut ooriutiminnik atuisimanngisaannarput,

tusagassiortunillu sulianik paasissutissanik pissarsinissaminnut piffissaqanngisaannarlutik. Tamanna ingasappoq iliuuseqarfigineqartariaqarlunilu. Inuinnaat naalakkersueqataaneranni immikkut pisinnaatitaaffiit ilagaat qinersisartut silittumik paasisassarsiorsinnaanerat.

Oqaaseq demokrati nalliuttorsiornerni atorneqarajuttarpoq, ingammik pissaanillit imminnut ataqqineqarnissartik nittarsaakkaangassuk. Amerikamiut isumaqartarput nunarsuaq tamakkerlugu demokratiimik siuarsaaniartuullutik illersuiniarlutillu sorsuuteqarlutik. USA-lu pillugu isumaga allanngortinneqarsimavoq: Tamanna ingasagisassaanngilaq!

Ajalusoorneq

Inuinnaat naalakkersueqataanerat qajannartuuvoq. USA-mi ajalusoorluinnarsimasutut isikkoqarpoq.

Præsidenti sapaatip akunnialui matuma siornagut ivertinneqarnermini oqalugiarmat, nunarsuarmi pisuunerpaat katersuussimapput isorisaqaratik ersaartaattarlutik, pisuussutimik suli annertusiartornissaat neriuutigalugu. Piumallerlutillu nikuillutik ersaartaallutik nuannaarutigisarpaat aningaasaatitik atorlugit qinigassanngortitartik qinerneqarmat. Aningaasat qinersinermut sunniuteqartarnerat nutaarsiassaanngilaq, Inatsisartulli Nunatsinni qinersisarnernut aningaasatigut tapiissuteqartarnerup inerteqqutaalernissaanik aalajangernerat piffissaq eqqorlugu iliuuseqarneruvoq. Piffissaq kingullerpaaq atorlugu iliuuseqartoqarpoq, tamanna ajunngeqaaq.

Tamanna nasaarfigaarput politikikkullu iliuuserineqartumut qujaniarluta sikisarluta, tamannami Inatsisartunut ilaasortanit 22-nit akuersissutigineqarmat. Taama pisoqarsimanngikkaluarpat qinersinissatsinnut atatillugu Amerikamiut dollariinik tapiissuterpassuarnik takusimassagaluarpugut.

Allalli aqqutigalugit qinersinitsinnut sunniiniartoqarsinnaalluarpoq. USA-mi naalakkersuisut maanna uivernermik paatsiveerutsitsinermillu pilersitsisarnermikkut naalakkersuisarput. Toqqissisimajunnaarsitsisinnaagaangamik avissaartuutitsisinnaagaangamillu pissaaneqartarput. Periuseq tamanna avissaartuutitsilluni naalakkersuinermik taaneqarpoq. Taamaattorli Amerikamiut „demokratiianni“ inuiaqatigiinnilu aaqqissuussaaneranni.... nuannaartorisatut anguniagassaqanngilaq.

Taamaattoqanngilluinnarpoq!

Tatineqarneq anneruleraangat

Inatsisartunut qinersinissaq pissutsini immikkorluinnaq ittuni pivoq. Nunarsuaq tamakkerlugu nunarujussuarput amerlanngitsunik inulik maluginiarneqalerpoq.

Maanna qineqqusaartorpassuit qimerlooraanni, maluginiarpara qineqqusaartut nuimanerit akornanni inuusunnerusut amerlanerusut. Tamanna pitsaallunilu pitsaanngitsortaqarpoq.

Inuusuttut politikimut akuliukkusukkaangata nuannaarutigineqartarput, inuusuttulli politikerneranni isummat amerlanngitsut sammineqarajuttarput, taamaalillunilu Nunatta siunissaa pillugu oqallinneq annertunerusoq itisiliinerusorlu ajornannginnerulertarluni.

Politikerit illuatungaannarsiortumik oqallisigisaqarsinnaasarput. Tamatumunnga atatillugu soqutiginaateqassalluni takussallugu Nunatsinni tusagassiorfiit politikerinut orsugissamik aamma namminiilivinnissap pilluarnartuinik taamaallaat eqqartuerusuttunut qanoq periarsinnaanersut.

Tamanna soqutiginarluinnassaaq.

Siunissaq

Siunissaq qanoq isikkoqassanersoq oqallisigissallugu eqqaamasariaqarparput — namminiilivissimagutta naalagaaffeqatigiinnulluunniit suli ilaanerput apeqqutaatinnagit. „Kuulti qaqortoq“ aamma namminiilivinniarneq pillugit oqariartaatsit meeqqatta, atuarfeqarfitta peqqinnissaqarfiullu politikikkut akisussaaffigineqarnissaat pillugu oqallinnissamut taalliisimatitsisinnaapput.

Meeraq sumiginnagaasoq nunami namminiilivissimasumi imaluunniit naalagaaffeqatigiinnut ilaasumi inoorusunnersoq aperigukku, isumaqarpunga soqutiginngilluinnassagai.

Taamatut utoqqaat misilittagartuut sinnerlugit politikerit unammillerusuppavut — tassa uagut soraarnerussutisiaqalersimasugut.

Politikikkut siuttuusimasut arlallit maanna utoqqalisimasut, ukiuni sisamani tulliuttuni namminiilivinnissaq apeqquseraangassuk kukkunersiuisupalaatut eqqarsarluartartutut taaneqartarput. Misilittagaqarnerput eqqarsarluartarnerpullu iluaqutigisarpavut, ukiorpassuarnimi inuusimagatta. Kingumut ingerlaniartutut taaneqarnissarput tusaarusunngilarput! Ernuttatsinnut, taakkua atuarfiannut tamatsinnullu peqqissutsimik isumaginnittunut aaqqiissutissanik ujartuivugut.

Eqqaamajullu: Suli qinersisinnaatitaagatta.