Sermersuaq ukiut 29-ssaat aakkiartortoq
Sermersuup aakkiartornera siornatigornit annikinnerulersimavoq, taamaakkaluartoq suli milliartorluni.
Apisarneranit sermeq annertunerusoq appaagu aassappat, taama ingerlasoqarneranit ukiut 30-ssaat pissaaq.
Assi: Nathan Maier
- Ukiuni pitsaanerpaaniluunniit pissutsit ajorput, GEUS-imi silap pissusianik ilisimatusartoq Signe Hillerup Larsen tusagassiuutinut nalunaarummi oqarpoq.
Sermersuaq ukiut 29-ssaat milleriarpoq. Sermeq 105 milliardit tonsit missaat ukiuni kingullerni aalluni imaanut kuussimanissaa ilisimatusartut missingerpaat.
Naak kisitsisit annertugaluartoq, ilimagineqartutut ajortiginngilaq.
- Nalunaarsuisalernitsinnit kisitsisaatigut aallaavigalugit sermersuaq agguaqatigiissillugu ukiumut 140 milliardit tonsit missaannik annikillisarpoq. Taamaattumik ukiuni kingullerni aakkiartornera taama ajortiginngilaq, Signe Hillerup Larsen oqarpoq.
1985-imiilli sermersuup aakkiartornera pillugu paasissutissat katersorneqartarlerput, 2012-imi aatsaat taama aatsigaluni. Tassani 500 milliard tonsingajannik ilanngarpoq. Alpini sermit tallimariaataannik.
Sermseq aakkiartunnginnerusoq?
Sermersuaq ukiuni kingullerni tallimani arfinilinniluunniit sermip kaanngartarnera annikinneruvoq. 2019-imi 400 milliardit tonsit sinnerlugit ukioq mannalu 100 milliardit tonsit missaanniilluni.
Sermip aannikinnerulerneranik isumaqarsinnaavoq, ajoraluartumilli taamaattoqanngilaq, Signe Hillerup Larsen oqarpoq.
- Silap allanngorarnera pissutaasoq ilimanarluinnarpoq. 2010-kkunni ukiut ilaanni silap allanngorartorujussuunerata, ukiuni tulliuttuni allanngorpallaarpasinngitsutut isikkoqalersippaa. Qanorluunniit pisoqarsimagaluarpat ukiut tamarmik assigiimmik kinguneqartarput, tassa sermeq milliartortarpoq. Annertuumik annikitsumilluunniit.
Semersuaq 1986-imiit qanoq annertutigisumik aakkiartornersoq uani takuneqarsinnaavoq.
GEUS
Nalinginnaasunngussasoq
Apisarneranit sermeq annertunerusoq appaagu aassappat, taama ingerlasoqarneranit ukiut 30-ssaat pissaaq. Tassa imaappoq, kinguaariit ataatsit Sermersuup milliartornera kisiat misigisimassavaat. Taamaaginnarnissaalu ilimanaateqartoq Signe Hillerup Larsen naliliivoq.
- Issittumi kiatsikkiartornera pissutigalugu aakkiartorpoq, allanngornissaanullu takussutissaqarani. Taamaattumik sermip aakkiartuinnarnissaa ilimagaarput, soorunami ukiut tamaasa allanngorarluni, oqarpoq.
Sila pillugu ilisimatusarnerup ukiuni 30-ni ingerlanera pissutaalluni, sermip aakkiartortuarnera piaarinaatsoornerinnarmik pinnginneranik tunngavissaqalersitsivoq. Taamaattoqartartoq. Nalinginnaasoq.
SERMERSUUP ANNERTUSSUSAA
Sermersuaq pillugu GEUS-imi sermersiuut ukiut tamaasa septembarip aallaqqaataani naatsorsuisarput. Ukiukkut qanoq apitigisimanersoq, aasaanerani qanoq aassimatiginersoq sermillu kaangarsimanera nalunaarsorneqartarlutik. Tamanna ukiup affaani aakkiartorfimmik imaluunniit annertunerulerfimmik taaneqartarpoq, serminut sermertanullu nalunaarsuinermi piffissaliussatut atorneqartarluni.
Nalunaarsuineq sermersuup nakkutigineqarneranik suliniutinut arlalinnut ilaavoq, taakkulu Danmarkimi Kalaallit Nunaannilu ilisimatusarfiit allat arlallit suleqatigalugit suliarineqarput.
Aasaq nillernerusoq
Signe Hillerup Larsen suleqatinilu ukiup ingerlanerani pissanganerluleraluarput. Sermersuup aannissaa aatsaat taama annertutigissasoq ilimagineqaleraluarami. Sermersuaq ukioq aperpianngilaq, taamaattoqarneratalu kinguneranik aasarpat kiattalerpallu sermip aannerusinnaanera ilimanaateqaleraluarluni.
Februaarimiilli juunip tungaanut apinerulerpoq, silap pissusianik ilisimatusartoq oqarpoq.
Kalaallit Nunaanni aasaq maanna qaangiummat aakkiartorfiulluarpallaannginnera paasinarsivoq.
