Sermersuup Gentoftemik isumaqatigiissutini atorunnaarsikkaa
Gentofte Kommunep Tasiilallu illoqarfittut ikinngutigiinnerat ukiunik 13-inik pisoqaassusilik taamaatinneqassasoq Kommuneqarfik Sermersuumi kommunalbestyrelsi aalajangerpoq.
Justus Hansenip Gentofte Kommunep illoqarfittut ikinngutigilernissaa kommunalbestyrelsimi oqaluuserisassanngortippaa. Isumaqatigiissut maanna Kommuneqarfik Sermersuumit atorunnaarsinneqarpoq.
Toqqorsivimmiit assi: Leiff Josefsen
Gentofte Kommunip Sermersuup aqutsisoqarfianit decembarip qulingiluaani, januaarip 21-ani kingusinnerpaamillu februaarip qulingani saaffiginnissutigineqartut pingasut qisuariarfigisimanngimmagit ikinngutigiinnermik isumaqatigiissutip atorunnaarsinneqarnissaanik aalajangerneq marlunngornermi pivoq.
Kommuneqarfik Sermersuup isumaqatigiissut 2012-imi isumaqatigiissutigineqartoq nutarterniarlugu kissaatigisimavaa.
Saaffiginnittaraluarnerit kinguneqanngitsut
Kommunimi atorfilittat qullersaat Ole Jakobsen kommunalbestyrelsimi ilaasortanut saqqummiussamini ima allappoq:
- Isumaqatigiissutip nutarterneratigut nunap immikkoortuani pissutsinut naleqqussarlugu meeqqallu tamarmik peqataanissaannut periarfissiilluni naligiimmik imminnullu iluaqutaasumik suleqatigiinnerup ingerlaannarnissaa siunertaavoq.
DR-ip piviusulersaarusiaq assortuussutaasoq “Byen, hvor børn forsvinder” 2019-imi takutimmagu suleqatigiinnikkut ajornartorsiuteqalerpoq. Gentofte Kommune piviusulersaarusiaq Tasiilami inuppassuit inuttut ajornartorsiutaannik annertuunik qulaajaasoq tunuliaqutigalugu atuartut qallunaat Tasiilamut tikeraaraangamik angerlarsimaffinni unnuisartussaajunnaarlutik Minihallenimi unnuisassasut aalajangerpoq.
Tamanna pissutigalugu politikeri Justus Hansen, Tasiilami najugaqartoq, qisuariarpoq suliarlu 2023-mi kommunalbestyrelsimi oqaluuserisassanngortillugu.
- Tasiilarmiuusugut meeqqanik kinguaassiuutitigut atornerluisartutut imigassamillu atornerluisartutut Gentoftemi ilaqutariinniit kommuunimiillu saqqummiunneqarnerput eqqarsaatigigaangakku nuanniitsumik misigisarpunga, Justus Hansen allappoq, isumaqarluni suleqatigiinneq naligiinnermik tunngaveqartariaqartoq.
Borgmesteri tunngavilersuisoq
Ikinngutigiinnermik isumaqatigiissummut ilaajunnaarniarluni aalajangerneq pillugu borgmesteri Avaaraq Olsen ima oqarpoq:
- Ikinngutigiinnermi ataqqeqatigiinneq tatiginninnerlu pisariaqarput. Tamakku amigaatigilerutsigit tunuarluni suleqatigiinnerup eqqarsaatigeqqinnissaa pissusissamisoorpoq. Isumaqatigiissut nutarterniarsarigaluarparput, illuatungeriilli tamarmik suliamut tunniusimanissaat pingaaruteqarpoq.
Atuartut paarlaasseqatigiillutik angalasarnissaat kommunip suli pingaartikkaa borgmesteri oqarpoq.
- Taamaammat allaffeqarfiit assingusunik nutaanik isumaqatigiissusiornissamut periarfissarsiornissaminnik peqquneqarput, Avaaraq Olsen oqarpoq.
