Frankrigip præsidentia Emmanuel Macron sapaatiummat
Nunatsinnut tikeraarmat, isumannaallisaaneq illersornissamullu tunngasut USA-mullu ersarissumik
oqariartuuteqarnissaq kisimik oqaluuserineqanngillat. Silap pissusiata
allanngoriartornerata inuiaqatigiinnut sunniutai pillugit oqaloqatigiinnissamut aamma
piffissaqartoqarpoq.
Frankrigip præsidentia Emmanuel Macron sapaatiummat
Nunatsinnut tikeraarmat, isumannaallisaaneq illersornissamullu tunngasut USA-mullu ersarissumik
oqariartuuteqarnissaq kisimik oqaluuserineqanngillat. Silap pissusiata
allanngoriartornerata inuiaqatigiinnut sunniutai pillugit oqaloqatigiinnissamut aamma
piffissaqartoqarpoq.
Nunat siuttui pingasuullutik Qamanaarsuup Sermianut
qulimiguulimmik takuniaapput, tassanilu Silap Pissusianik Ilisimatusarfimmi
ilisimatusartoq Malene Simon Hegelund silap pissusiata allanngoriartornerata
inuiaqatigiinnut sunniutai pillugit oqaluttuarluni.
Ulluinnarni sunniutigisartagai
– Qulimiguulimmit anilluta sermip killinganut pisutsilluta
takusavut oqaloqatigiissutigaavut, Malene Simon Hegelund oqaluttuarpoq,
taassumalu Franskit præsidentiat, Danmarkimi ministeriuneq Naalakkersuisullu siulittaasuat
soqutiginnilluinnartutut misigisimavai.
– Sermersuup aakkiartornera qanoq sukkatiginersoq Macronip apeqqutigaa,
ulluinnarnilu inuunitsinnut qanoq sunniuteqartarnersoq paaserusullugu.
Oqaluttuuppara silap pissusiata allanngoriartornera nunami sumiinnerput
apeqqutaatillugu assigiinngitsumik misigisaripput. Taamaattorli
kiatsikkiartornera sermillu aakkiartornerat nalinginnaasumik sukkasuumik
ingerlasut. Qaanaamit assersuummik saqqummiussivunga, taavanimi immap sikua
misissorlugulu ukiorpassuarni uuttortartarnikuuara, tamaanilu immap sikua
nalinginnaasumik qajannarnerulersimavoq piffissamilu sivikinnerusumi
sikuusalerluni, tamannalu piniartunut qimminnik sikukkut
piniariarsinnaanngitsunut sunniuteqartorujussuulluni.
Kangerlummi iluliaminerpassuit
– Upernaaq kingulleq Nuummi kangerlummi iluliaminerpassuit misigisavut
aamma oqaluttuaraakka, taakkumi pimmata silap kiannerulernerata sermeqarfiillu
aakkiartornerisa kingunerinik. Nunap ilaani tamaani siornatigut
inoqarfiusimasut piniariarfiusartullu ilanngullugit oqaloqatigiissutigaavut.
Tamakkununnga atatillugu Naalakkersuisut siulittaasuata Jens-Frederik Nielsenip
najukkami pissutsinik ilisimasaqarluarnini takutippaa.
Nunat siuttui pingasut Emmanuel Macron, Mette Frederiksen aamma Jens-Frederik Nielsen qulimiguulimmik Qamanaarsuup Sermianukarput, tassanilu sermip tiffariarsimanera ersarilluinnarluni.
Assi: Oscar Scott Carl
Taamaalilluni silap pissusiata allanngoriartornera,
tamatumalu maani Nunatsinni inuunitsinnut sunniutai pillugit oqaloqatigiinneq
Nunatsinnut tunngasorujussuuvoq.
Oqaloqatigiinneq sivikikkaluartoq Malene Simon Hegelundip
Silap Pissusianik Ilisimatusarfik aamma silap pissusiata allanngoriartornerata
uumassusillit ataatsimut isigalugit sunniutai naggataatigullu sinerissami
innuttaasunut sunniutai saqqummiussinnaagamigit tulluusimaarutigai.
– Silap pissusiata allanngoriartornerata sunniutai
pillugit nunarsuarmi siuttuusut ilaannut kalaallit isiginnittaasiat
saqqummiussinnaagakku nuanneqaaq. Piffissamilu silap pissusiata avatangiisillu
politikikkut oqaluuserineqartussanut ilanngunnissaasa ajornakusoornerisa
nalaani, tamanna immikkut anginerujussuuvoq, Malene Simon Hegelund oqarpoq.
