Sisimiuni innuttaasut: - Nunatsinni allanngortoqalerpoq

Siumut aamma IA ukiorpassuarni politikkikkut siuttuusarsimasut, maanna allanngortoqarpoq. Maanna Demokraatit Nalerarlu siuttunngorput.

Nunatsinni allanngortoqalerpoq, taama Sisimiuni innuttaasut ullaaq iteramik eqqarsarput. Sermitsiap Sisimiuni innuttaasut ullaakkut naapippai.

Jørgen Enoksenip kisitsisit inerneri takugamigit nuannaatsappoq:

- Allannguilaarnissaq kissaatigigakku. Taakkuinnaaviit qinerneqarsinnaanngimmata. Isumaqatiginninniarnerit takutikkumaarpaanaasiit qanoq pisoqassanersoq, pissangallunga utaqqissavakka.

Jens Heinrichip kisitsisit inerneri tupaallaatigai:

- Tupaallaatigisorujussuullugillu, ilimagisanni angusarissaartoqarpoq. Neriuppunga qinikkat nutaat sullissilluassasut. Allannguutissai pissanganassapput. Qineqqusaarutitik attatissaneraat pissangagaara. 

Preben Mølgaardi misigisimavoq nutaat maanna aallartittussanngortut. 

- Allannguuteqarfiusussamut makippugut. Neriuuteqarpunga Inatsisartunut isertussanut, nunarput siuariaateqartissagaa.

Suakannguaq Kristensen qinersinerup unnukkua TV-kkut malinnaaffigaa, malinnaanerminili sinilertoorpoq:

 - Iterama ingerlaannaq inerneri takupallappakka. Siumut IA-lu siuttuusartut silattuussaraagut, maanna allanngortoqalerpoq. Piffissaq pissanganarpoq.

Sermitsiaq aamma Erne Olsen naapippaa, taanna Sisimiuni Demokraatini siulittaasuuvoq. Naak qasugaluarluni nuannaaqaaq qungujulaqaluni. 

- Nuanneq amiilaarnaq! Takutippaa allannguerusuttoqarpoq. Qujanarujussuaq taasiartortunut! Erne Olsen qungujulaqaluni oqarpoq.

Frederik Olsen qineqqusaarnerit malinnaavigilluarsimavai, kisitsisillu inerneri maluginiarluarlugit.

 - Inerneri takugakkit eqqarsarpunga nunatsinni allannguisoqarnialerunartoq. Ingammik Demokraatit siuariaateqarujussuarnerat tupaallaatigaara. Inernerineqassangatinneqartunik tusarnikuunnginnama. Siunissaq pissanganartorujussuuvoq, qanoq pisoqassanersoq. Kikkut naalakkersuisoqatigiissanersut assut pissangagaara.

Suliffeqarfinni allanngortoqarnissaa taasuma ilimagaa:

- Imaassinnaavoq niueriaatsit suliffeqarfinnilu ingerlariaatsit allanngussasut. Demokaatit nalunngilagut namminersortuuneq assorujussuaq sorsuutigigaat. Imaassinnaavoq innuttaasut tamakkununnga isiginninnerulersut. Pisortat suliffeqarfiutaat immaqa namminersulissapput.