Sisimiuni politiini ulappunneq suliallu oqimaatsut 

Nunatta Naatsorsueqqissaartarfiata nalunaarutaanni atuarneqarsinnaavoq Sisimiuni siorna 2024-mi nalunaarutigineqartartut ukiup siulianut naleqqiullugit amerleriarsimasut.

Sermitsiaq paasisaqarnerujumalluni Sisimiuni politeeqarfik pulaarpaa. Tassani politikommissæri Karl Jørgenip politeeqarfiup iluatungaa takornariartippaa. Politeeqarfik Nuummi politeeqarfimmut sanilliullugu mikineruvoq, nutarsarneqarsimavorli.

Saaffiginnittarfik ammasuusimasoq, maanna isumannaallisarlugu matua paarnaartartunngorsimavoq. Illup ilua, silataa isertitsiviillu sisamat videonik nakkutilliissutinik ikkussuiffigineqarsimapput. Isertitsivinni videot nakkutilliissutit nuummut attaveqarput, taamaalillutik isertitsivimmiittut nuummi sulisut toqqaannaq attaveqarfigisinnaallugit.

- Isumannaallisaaneq pitsaanerulersimavoq, aamma nuannaarutigaarput ataatsimoorfittaarnerput, tassani sulisut nerillutillu ataatsimiissinnaapput. Siornatigut sulisut allaffimminni nerisarnikuupput, Karl Jørgen Lennert oqaluttuarpoq.

Naluaarutit amerleriartut - suliat oqimaatsut

Kalaallit Nunaanni Politiit ukiumoortumik nalunaarutaanni allassimavoq siorna 2024-imi Sisimiuni politiinut nalunaarutit 399-usut, taakkunani 99-it nakuusernermut tunngasuupput.

- Ukiuni kingullerni marlunni nakuusernerit amerlapput - taakku innuttaasut inuit nittartakkakkut attaveqaqatigiittarfiinni assut naammagittaalliuutaapput. Inuit aalajangersimasut tigusarinissaat ukkatarisimavarput, Karl Jørgen Lennert oqaluttuarpoq. Naak illoqarfik eqqissisimanerulaaleraluartoq, sulianik nutaanik takkuttoqartuaannarpoq.

Nakuusernerit saniatigut suliat oqimaaqisut politiit aamma suliaraat. Tassaallutik meeqqanik kinguaassiuutitigut atornerluinerit meeqqanullu tunngasunik tiingalersaarutinik videoliat.

- Suliaq ataaseq "blækspruttesagimik" taajorparput. Oqimaatsuuvoq inummit ataatsimik aallaaveqartoq. Inuup ataatsip meeqqanut tunngasunik assinik siammarterisimavoq, inuppassuarnullu siaruaassimalluni. Suliaq taanna suli eqqartuussivimmi suliarineqanngilaq.

Taassuma ilanngullugu oqaatigaa meeqqanik atornerluinermik videoliat inuit attaveqaqatigiittarfiini siammarterneqarsimasut. Inuk ataaseq ukioq ataatsip missaani politiinit tigummigallarneqarpoq eqqartuussivimmilu sassartinneqarluni.

Suliaralugit tarnikkut oqimaatsut

Suliat oqimaatsut suliarissagaanni tarnikkut nukittusariaqarpoq. Politiini suliaqartut oqimaatsunik suliaqartarput, Karl Jørgen Lennertillu sulisuni nersualaarpai:

- Sulisoqarpugut pikkorissorsuarnik assut ukkatarinnittunik - suliallu saniatiagut sulianik allanik tigusisarlutik. Nersualaartariaqarput.

Inersimasunut akisussaasunullu kaammatuuteqarpoq:

- Meeqqat ilai atisaqaratik imminut assilisarput, assillu ingerlateqqissinnaasarlugit. Nalusarpaalli assit ingerlateqqitatik qanoq kinguneqarsinnaanersut. Angajoqqaat meeqqatik oqaloqatigisariaqarpaat. 

Inuusuttut imigassarlu

Pinerlunniartartut amerlanerit inuusuttuusut Karl Jørgen Lennertip oqaatigaa, amerlanertigullu imigassartorsimasuusarput.

- Suliassaq politiit kommunillu kisimik kivissinnaanngilaq, inuiaqatigiit aamma kivitseqataasariaqarput.

- Sisimiut toqqissisimasuussappat pinerlunnerillu ikileriassappata, inuiaqatigiit tamatta kivitseqataasariaqarpugut.