- Siumut Inatsisartunut qinersinissamut 53-inik
qinigassanngortitsissammat kommuninullu qinersinissamut 89-inik
qinigassanngortissammat qinigassanngortittut tamarmik nalunaarsorneqarnissaat
qulakkeerniarlugu teknikkikkut suliassat naammassiniarpagut, Siumup
siulittaasua Erik Jensen marlunngornermi Inatsisartoqarfimmi Siumup
ataatsimiittarfiani oqarpoq.
Tassani siulittaasup tullia Vivian Motzfeldt siulittaasullu tulliata aappaa
Hans Peter Poulsen peqatigalugit Siumup qineqqusaarutigiumaagai saqqummiuppai.
- Siumut Inatsisartunut qinersinissamut 53-inik
qinigassanngortitsissammat kommuninullu qinersinissamut 89-inik
qinigassanngortissammat qinigassanngortittut tamarmik nalunaarsorneqarnissaat
qulakkeerniarlugu teknikkikkut suliassat naammassiniarpagut, Siumup
siulittaasua Erik Jensen marlunngornermi Inatsisartoqarfimmi Siumup
ataatsimiittarfiani oqarpoq.
Tassani siulittaasup tullia Vivian Motzfeldt siulittaasullu tulliata aappaa
Hans Peter Poulsen peqatigalugit Siumup qineqqusaarutigiumaagai saqqummiuppai.
Nunarput siumut ingerlasoq
Qineqqusaarutit "Nunarput siumut ingerlasoq”-mik qulequtaqartut,
ataatsimeersuarnermi kingullermi Qasigiannguani ingerlanneqartumi
akuerineqartut, tunngavigineqarput, tassanilu peqqinnissaq atugarissaarnerlu,
pisortat sullissinerat, naalagaaffimmik pilersitsineq inuussutissarsiornerlu,
ilinniartitaaneq, inuusuttut meeqqallu, attaveqaatit angallannerlu
pingaarnertut sammineqarput.
- Nunarsuaq inuuffipput allanngoriartorpoq, nunarsuarmilu
tusagassiuutit tamarmik qinersinerput malinnaavigissavaat, siulittaasup tullia Vivian
Motzfeldt aallaqqaadiutimini ilaatigut oqarpoq.
- Namminiilivinnissaq ukkatarineqartorujussuuvoq,
qinigaaffimmilu kingullermi aalajangiinerit ingerlateqqinniarpavut, tassani
innuttaasut peqataatinneqarnissaat tusarnaarnissaallu qulakkeertarpavut.
Namminiilivinnissamut tunngatillugu pingaarutillit nassuiarneqarnissaat
innuttaasunik namminiilivinnissamut taasititsinissaq qulakkeerniarlugu pingaaruteqarpoq,
Vivian Motzfeldt oqarpoq nassuiarlugulu qinigaaffimmi kingullermi aalisarnermut
inatsimmut takornariaqarnermullu inatsimmut tunngatillugu pingaarutilinnik
aalajangiisoqarsimasoq, tassani innuttaasut pitsaanerpaamik atugaqarnissaat
qulakkeerneqarmat aamma innuttaasut pisuussutinik piginnittuunissaat
erseqqissarneqarpoq.
Attaveqaasersuutit nutarterneqarnissaat aningaasalersornissaallu
qulakkeerneqassasut
- Kalaallit Nunaanni umiarsualiviit nutarterneqarnissaat,
umiarsualivinnilu suliassaqarfimmut pilersaarummut nutarterneqartumut
aningaasalersuineq ingerlaannarnissaat qulakkeertariaqarparput, Hans Peter
Poulsen oqarpoq nangillunilu:
- Tamanna aalisarnermut iluaqutaassaaq, umiarsualiviilli
aamma takornariaqarnermut pingaaruteqarluinnarput. Umiarsualiviit
aserfallatsaaliorneqarnerat kinguaattooqqavoq, umiarsualiviillu
aserfallatsaaliorneqarnissaasa qulakkeernissaa naammanngilaq, umiarsualiviit
taakkualu inissai nutarternngikkutsigit iluaqutigiunnaassavagut, Hans Peter
Poulsen oqarpoq nassuiarlugulu qinigaaffimmi tulliuttumi sinerissami
timmisartumik ilaasunik angallassinermut kiffartuussinermut isumaqatigiissutit
nutarterneqassasut.
- Mittarfiit nutaat atulerpata sinerissami ilaasunik
timmisartuussinermi aqqut nutaaq allanngortinneqassaaq, kiffartuussinissamut
isumaqatigiissutit nutaat innuttaasunut iluaqutaasut qulakkeertariaqarpavut,
Hans Peter Poulsen oqarpoq.
Atuarfitsialak nalilersuiffigeqqinneqassasoq
Erik Jensenip
ilinniartitsisut kattuffiat IMAK suleqatigalugu atuarfitsialaap nutarternissaata
qinigaaffimmi tulliuttumi pinissaa pillugu Siumup politikkia saqqummiuppaa.
- Atuarfitsialammi
atuartitsineq sivisunerusoq oqaatigineqartarpoq, kisianni meeqqat atuarfiat
nutartertariaqarlugulu piffissamut matumunnga naleqqussartariaqarparput,
angajoqqaallu akisussaaffeqarnerulersillugit. Meeqqat atuarfiata
nutarternissaanut pilersaarusiorpugut, tamannalu meeqqat siunissamut
neriuuteqalersitsisumik atuarfianik nukittorsaaffiussaaq, Erik Jensen oqarpoq.
Nunarsuaq
nutaaq
Nunanut allanut
tunngasunut naalakkersuisup tunuartussap Vivian Motzfeldtip illersornissamut
isumaqatigiissut Issittumilu silarsuassami nutaami isumannaatsuunissap
eqqissinerullu qulakkeerneqarnissaat siunertaralugu Issittumi
isumannaallisaanikkut piginnaasanik nukittorsaasoq kingullermik
atsiorneqarsimasoq eqqartorpaa.
- Nunatut
nunarsuarmi pingaaruteqartumi inissisimavugut, tamannalu suleqatitsinnut
pingaaruteqarpoq, akisussaaffippullu ilisimaarisariaqarparput, Issittullu
Atlantikullu Avannaata isumaqatigiissutaata immikkoortuanik tulliuttumik
isumaqatigiinniarnissatsinnut piareersarnitsinni eqqarsarluartariaqarpugut.
Piffissami namminiilivinnissamut ingerlaffiusumi innuttaasut
peqataatinneqarnissaat qulakkeertariaqarparput. Paragraf 21-llu
atuutilersinnginnerani isumaqatigiinniarnernik aallartitsisussanut oqartussaassuseq
qulakkeerniarlugu apeqqutillu taama pingaaruteqartigisup qularnaatsuunissaa
pinngitsoortinniarlugu innuttaasunik taasititsisariaqarpugut, Vivian Motzfeldt
oqarpoq.
