Tasiilami ilinniarnissamut periarfissaq nutaaq

Perorsaanermik Ilinniarfik (PI) Tasiilami siunnersortimut ikiortitut nunagisaq qimannagu ilinniartunik holdimik ataatsimik, sapaatip akunnerani 43-mi aallartitsissaaq.

Ilinniartitsineq katersortarfimmi pissaaq, isumaginninnermilu sulisunut ulluinnarni isumaginninnikkut ajornartorsiutinik suliaqartartunut sammitinneqassalluni.

– Kommuni suleqatigalugu Tasiilami ilinniartitsineq aallartipparput, 20-llu sinneqartut peqataaniarlutik nalunaareersimallutik, Perorsaanermik Ilinniarfimmi forstanderi Ulunnguaq Markussen oqarpoq.

 Ilinniartitaanerit innuttaasunut qaninnerusut

Tamatumunnga assingusumik Sisimiuni meeqqerivinni ikiortitut ilinniakkaminnik naammassinnittut Perorsaanermik Ilinniarfimmit qanittukkut soraarummeertinneqarput.

– Qeqqata Kommunia suleqatigalugu ilinniartitsineq tamanna naammassivarput, qanittukkullu Kommuneqarfik Sermersooq suleqatigalugu Nuummi holdimik allartitsissalluta. Taakku saniatigut Upernavimmi nunagisaq qimannagu holdimik ilinniartunik aallartittoqareerpoq, Ulunnguaq Markussen oqarpoq, nangillunilu:

– Uatsinni ilinniarnissamik soqutiginninneq annertusiartorpoq, amerlanerujartuinnartulli illoqarfimminni ilinniagaqarsinnaanissartik kissaatigaat. Aamma kommunit arlallit najukkami ilinniakkamik aallartitserusullutik saaffiginnittarput – periarfissavullu naapertorlugit misissuinissamut ammajuaannarpugut. Siunissami nunagisaq qimannagu ilinniagaqarnermik aamma ungasianit ilinniartitaanermik suli amerlanerusunik neqerooruteqartalissasugut upperaara, taamaalillutalu ilinniagassatut neqeroorutigisavut innuttaasunut qaninnerulersillugit. Ilinniartitsinivummi Nunatsinni sumiluunniit najugaqaraluaraanni atorneqarsinnaammata, tamannalu pisussaaffiliivoq.

Unammillernartut

Perorsaanermik Ilinniarfiulli ilisimasat sinerissamut tamarmut siammarternissaat unammillernartissimavaa, ilisimasat annerusumik Ilulissani pilersinneqartarmata.

– Nammineq unammilligassatsinnut inuiaqatigiillu pisariaqartitaannut naatsorsuutigisaannullu qanoq naleqqussarsinnaanerluta naammassinnissinnaanerlutalu eqqarsaatersuutigisarsimaqaarput. Siunertarineqartoq tassaavoq, kikkut tamarmik – meeqqat, inuusuttut, inersimasut utoqqaallu – ilisimasanit paasisimasassanillu pilersitatsinnit iluaquserneqarnissaat.

– Inuussutissarsiornermut ilinniaqqinnermullu ilinniaqqinnerit allat aamma misissorpavut, aamma najukkami ilinniarnernut qanoq ililluta attaveqaatitigut internetikkullu ineriartortissinnaanerivut misissorlugit – pitsaassuseq ilinniarnerullu anguniagai akornusernagit – akerlianilli piviusunut aamma inuussutissarsiornernut suli qaninnerulersillugit. Taamaalillutik sulisut ukiorpassuarni suliffimminni misilittagaqarluartut ilisimasaat akuerineqarsinnaanngorlutillu uppernarsarneqarsinnaalissapput, tamatumalu saniatigut nutaanik ilisimasaqalerlutillu ulluinnarni sulinermi atortussaminnik amerlanerusunik pissarsisinnaassallutik, Ulunnguaq Markussen oqarpoq.