Trump: Kalaallit Nunaat tamakkiisumik tiguassavarput

USA-p præsidentia Donald Trump apersorneqarnermini nutaami Kalaallit Nunaat pillugu erseqqissumik oqaaseqarpoq.

„Kalaallit Nunaat tigussavarput, aap, 100 procentimik,“ USA-p præsidentia Donald Trump NBC News-imit apersorneqarami oqarpoq.

Nangilluni oqarpoq „sakkutuut atornagit taamaaliorsinnaanerput ilimanarluinnartoq“, suulli tamaasa itigartinngilai.

- Nerrivimmi tigusissanngilanga, præsidenti oqarpoq.

Trump aamma oqarpoq Kalaallit Nunaata tiguarnissaa pillugu “oqaloqateqarluarsimalluni”, kikkulli oqaloqatigisimanerai oqaatigineqanngilaq.

Amerikamiut Kalaallit Nunaannik tiguaanerat Ruslandimut nunallu sinneranut qanoq sunniuteqassanersoq aperineqarami Trump ima akivoq:

- Eqqarsaatigivallaanngilara, soqutiginngilara. Kalaallit Nunaat pillugu apeqqut allaanerulluinnarpoq. Nunarsuarmi eqqissineq pineqarpoq.

Taamatut oqariartuuteqarpoq USA-p præsidentiata tulliata J.D. Vancep Kalaallit Nunaat Amerikallu sakkutooqarfia Pituffik  tallimanngormat tikeraareeraalu.

Vance Kalaallit Nunaanni naalakkersuisunngortut saqqummiunneqarnerannit nalunaaquttap-akunnialui qaangiuttut tikippoq.

Kalaallit Nunaanni Naalakkersuisut siulittaasuata nutaap Jens-Frederik Nielsenip Amerikamiut tikeraarnerat „ataqqinninngitsuliornertut“ taavaa.

J.D. Vancep tikeraarnermini Danmark isornartorsiorpaa ilaatigut oqarami „Danmarki iluamik pisimanngitsoq“.

Vance ima oqarpoq: “Danmarkimut oqariartuuterput paasiuminarpoq: Kalaallit Nunaanni innuttaasunut pitsaasumik sullissisimanngilasi.

Danmarkip eqqartorneqarnera naapertuutinngilaq, ministeriuneq Mette Frederiksen (S) kingusinnerusukkut oqarpoq.

Danmarki „sakkutuujulluartuuvoq nukittuujullunilu“, „pissutsinilu ilungersunartorsiorfiusuni“ ukiorpassuarni Amerikamiunut sanilliullugu, Frederiksen oqarpoq.

Kalaallit USA-mit tatineqarnerminnut periarnerat ataqqingaarlugu, arfininngormat oqarpoq

- Pissutsit taamaakkaangata politikkikkut partiit, naalagaaffeqatigiit nunallu tamarmik ataatsimoortariaqarput, aamma ataqqinnittumik naligiittumillu suleqatigiinnissaq pisariaqarpoq, tusagassiuutinut nalunaarummi oqarpoq.

Sapaatip-akunnerata tulliani pingasunngornermiit tallimanngornermut ministeriuneq Kalaallit Nunaannut tikeraassaaq.

/ritzau/