Trumpip Kalaallit Nunaat pillugu nalunaarutaa allatut isumaqarpa?
Donald Trumpip pingasunngornerup unnuaani Kongressimi oqalugiarnermini Kalaallit Nunaata aqulernissaanik soqutiginninnini eqqartortillugu oqaasiaa aalajangersimasoq amerlasuut maluginiarpaat.
Nunanut allanut ministeri Lars Løkke Rasmussen Finlandimut tikeraarnermini assilineqarsimasoq, tassanngaanniit Donald Trumpip Kalaallit Nunaat pillugu nalunaarutaa kingulleq oqaaseqarfigaa.
Assi: Ida Marie Odgaard/Ritzau Scanpix
Nunanut allanut ministerip Lars Løkke Rasmussenip, kunngikkormiut ilagalugit Finlandimi tikeraartup, Donald Trumpip Kalaallit Nunaat pillugu oqaaserisai oqalugiaataasalu qisuariarfigai.
- Kalaallit namminneq aalajangiisinnaatitaanerat ataqqillugu oqarnera maluginiaqquara. Tamanna oqalugiaataani pingaarnertaavoq, LArs Løkke Rasmussen DR naapertorlugu Finlandimi pingasunngornermi ullaakkut tusagassiortunik katersortitsinermi oqarpoq.
Illersornissamut ministerip Troels Lund Poulsenip oqalugiaat aamma oqaaseqarfigaa DR-imullu ima oqarluni:
- Trumpip unnuaq oqalugiarnermini oqaasiini ajunngitsumik maluginiagaqassagaanni, taava tamanna aamma oqaatigaa. Tassa kalaallit innuttaasut taakkualu kissaataat ataqqigini, illersornissamut ministeri oqarpoq.
Tatineqarneq annikillisinneqanngitsoq
Berlingskep USA-mi tusagassiortua Jacob Heinel maluginiagaqarsimavoq:
- Kalaallinik USA-mut qaaqqusivoq. Aningaasatigut sakkutooqarnikkullu tatisinissaq eqqartunngilaa. Piumagussi tikilluaqqusaavusi. Nangipporlu tamanna USA-mut pingaaruteqartoq.
Berlingske-mi politikkikkut oqaaseqartartoq Bent Winther ima naliliivoq:
- Trumpip Kalaallit Nunaat pigerusukkunnaarsimagaa isumaqartoqarpat, pilersaarutini piviusunngortikkusukkai unnuaq eqqaasinneqarsimapput. Taamaammat Danmarkip tatineqarnera annikillinngilaq.
Trumpip oqalugiaataa kalaallit qinersinerannut sunniuteqarsinnaasoq politikkikkut naliliisartoq isumaqarpoq.
- Kalaallit Nunaanni qinersinissamut sapaatip-akunnera ataasiujunnaartoq præsidentip Kalaallit Nunaat Amerikamiutut inissisimalerpat pisuussutinik angissutsimillu neriorsuinermigut qinersisartut piffissaq eqqorlugu pileritsaanniarsarai, Bent Winther oqarpoq.
Putinip periaasia
Sverigemi ministeriunerup nunanullu allanut ministeriunerup Carl Bildtip oqalugiaat inuit attaveqaqatigiittarfianni X-imi oqaaseqarfigaa, erseqqissarlugulu Trumpip oqariartuuteqarnermini “Kalaallit Nunaata tiguarnissaanik, ilanngunnissaanik imaluunniit USA-mut ilanngunnissaanik” sioorasaarinini uteqqikkaa.
„Taama Putinip nunat iliorfigisarpai,“ ministeriusimasoq Trumpip periaasia pillugu oqarpoq.
