Trumpip pakatsisimaarnerarluni oqaasii Rubiop russit ministeriata ataatsimeeqatiginerani uterai

USA-p nunanut allanut tunngasuni ministeriata Marco Rubiop, præsident Trumpip Ruslandip Ukrainemi sorsukkunnaarnissamik aaqqiissuteqarnissamut tunngatillugu pakatsisimaarneraarluni oqaasii, russit nunanut allanut tunngasuni ministeriata sisamanngornermi ataatsimeeqatiginerani uterpai.  

Rubio ataatsimeereernerminni taama oqartoq, nutaarsiassaqartitsivik Reuters paasissutissiivoq. 

- Præsidentip oqaasii uterpakka. Ilorraap tungaanukartoqannginnera narrujuummissutaallunilu pakatsissutaavoq, Rubio oqarpoq.

Trumpip “russit akerleriikkunnaarnissamut iliuuseqarusussusikinnerarlugit” tamanut ammasumik oqaatigisimasai Lavrovmut aamma uterini, Rubio aamma oqarpoq.

- Akerleriinneq tamanna qanoq qaangerneqarsinnaanersoq misissortariaqarparput, Rubio oqarpoq.

Amerikamiut russillu nunanut allanut tunngasuni ministeriisa oqaloqatigiinnertik isersuaatsutut ataatsimeeqatigeereernerminni taavaat. 

Taakkua Asiap kangimut kangisissortaani naalagaaffiiisa politikkikkut aningaasaqarnikkullu suleqatigiiffiata Aseanip Malaysiami sisamanngornermi ataatsimiinnerani oqaloqatigiipput. Minutsini 50-ini oqaloqatigiissimasut, nutaarsiassqartitsivik Reuters allappoq.

Ministerit marluk taakkua Ukrainemi pisut aammali Syriami Iranimilu pisut taamatuttaaq USA-p Ruslandillu suleqatigiileqqinnissaannut tunngasunik eqqartueqatigiissimasut russinit oqaatigineqartoq, Ruslandip nunanut allanut tunngasuni ministereqarfiata ilisimatitsissutigigaa Ruslandimi naalagaaffiup nutaarsiassaqartitsivia Tass paasissutissiivoq. 

- Akerleriinnerit qanoq qaangerneqarsinnaannerannik misissuinissaq, Rusland Amerikalu aningaasaqarnikkut ikiuiniarnikkullu suleqatigiileqqinnissaat nunallu marluk taakkua attaveqatigiilluaqqilernissaat soqutigigipput uppernarsivarput, ministereqarfik allappoq nangillunilu: 

- Tamanna nunat marluk taakku akornanni toqqaannartumik timmisartuusseqqittoqartalerneratigut siuarsarneqarsinnaavoq.

Rusland rakettit dronellu, tassa qaartartut ungasianiit aquttakkat atorlugit Ukrainemi illoqarfiit pingaarnersaanni Kyivimi saassusseqqissimasoq sisamanngornermi nalunaarutigineqarpoq.

Russit rakettit 18-t dronellu 400-t atorlugit Ukrainemut sisamanngornermut unnuaani saassussinerminni igeriussimasaasa amerlanerpaartaat Kyivimut igeriussimagaat, Ukrainep præsidentiata Volodymyr Zelenskyj-p oqaatigaa.

Rusland Ukrainemi ukiut pingasut matuma siorna saassusseqaarnerminilli aatsaat taama sakkortutigisumik saassussereersorlu, Zelenskyj taama ilisimatitsivoq.

Ruslandip dronet 728-t rakettillu 13-it saassussinermini igeriussimagai, Ukrainep sakkutuuisa timmisartortartuinut aqutsisoqarfia pingasunngornermi paasissutissiivoq. Igeriussani nakkartissimasaminni 711-t droneusut arfineq-marlullu rakettiusut, Ukrainep sakkutuui ilisimatitsissutigaat.

/ritzau/