Trumpip Putinillu naapinnissaat EU-mit tapersersorumaneqarpoq tamanna eqqissinermik pilersitsissutaasinnaassappat
Apeqqutit ikigisassaanngitsut aaqqinneqartariaqarput, Trumpip Putinillu akornanni ataatsimiinneq sioqqullugu, kremlip oqaaseqartartua oqarpoq.
Trumpip Putinillu naapinnissaat Ukrainemi eqqissinermik siuarsaasinnaappat EU tapersersuissaaqw, EU-p oqaaseqartartua tallimanngornermi oqarpoq.
Foto (Arkiv): Kevin Lamarque/Reuters
EU tapersersuerusuppoq amerikap præsidentiata, Donald Trump, aamma Ruslandip præsidentiata, vladimir putinip naapinnissaannut pilersaarummut, ukrainemi eqqissinermik tamanna pilersitsissappat.
- Ataatsimiinnerit suulluunniit, Ukrainemi eqqissinermik naapertuilluartumillu pilersitsinissamut tunngavissiisut, tikilluaqquneqarput, Olof Gill, EU-kommissionip oqaaseqartartua, nutaarsiassaqartitsivik afp naapertorlugu oqarpoq.
Trumpip sisamanngornermi oqaatigaa, Putinilu ataatsimiissinnaallutik sapaatip akunnerisa marluk iluanni Budapestimi, tamanna oqaatigaa præsidentit marluk taakku nalunaaquttap akunneri marluk sinnerlugit telefonikkut oqaloqatigeereerneraani.
Qaqugu ataatsimiinneq pissanersoq ilisimatitsissutigineqanngilaq.
Nutaarsiassaqartitsivik Reuters naapertorlugu tallimanngornermi Ruslandip naalakkersuisui kremlimi nalunaaruteqarput, Trumpip Putinillu akornanni ataatsimeeqatigiinneq sapaatip akunnerisa marluk iluanni pisinnaasoq, kisianni ulluliinissaq sioqqiullugu apeqqutit amerlasuut aaqqinneqartariaqartut.
Kremlip oqaaseqartartua, dmitrij peskov, tallimanngornermi oqarpoq, Ruslandip nunanut allanut ministeria Sergej Lavrov aamma amerikap nunanut allanut ministeria, Marco Rubio, oqaloqatigiittariaqartut ataatsimiinnissamik isumaqatigiissuteqarnissaq sioqqullugu, taamaalilluni ataatsimeersuarnissap tungaanut apeqqutit assigiinngitsut aaqqiivigineqarsinnaaniassammata.
- Apeqqutit amerlaqaat, isumaqatigiinniartussallu pilersinneqassapput il.il. taamaattumik tamarmik immikkoortukkuutaarlugit suliarineqassapput, kisianni præsidentit piareersimapput, Peskov oqarpoq.
- Ataatsimiinneq sapaatip akunnerini marlunni imaluunniit kingusinnerusulaartukkut pisinnaavoq. Ataatsimulli isigalugu paaseqatigiittoqarpoq, taamaammat kinguarsaasoqartariaqanngilaq.
Peskovip aamma oqarpoq Ruslandip suli ammasoq Ukrainemi sorsunnerup unitsinneqarnissaanik aaqqiissutissanik paaseqatigiinniarnissamut.
Rusland Ukraine nunallu Europami ikinngutaanut siusinnerusukkut pisuutitsinikuuvoq eqqissisimasumik isumaqatigiinniarnerit ingerlaqqissinnaajunnaarnerat pillugu.
Illuatungaani Ukrainep Rusland pisuutinnikuuaa piumasaqaatit akuerineqarsinnaanngitsut saqqummiussimanerarlugit, Putinilu eqqisseqatigiinnissamut pimoorussinnginnerarlugu.
Tallimanngornermi Kremlip aamma nalunaarutigaa Putinip Ungarnimilu ministeriunerup, Viktor Orbánip, ataatsimiinnissaq pillugu tallimanngornermi oqaloqatigiissimasut, Ungarnilu ataatsimiinnissamut qaaqqusisuunissaminut piareersimasoq.
