Tusagassiorfik: Amerikamiut Kalaallit Nunaannut isertortumik sunniiniarsaripput – Løkkep aallartitaagallartoq oqaloqatigiumagaa

Angutit amerikamiut pingasut, Kalaallit Nunaanni qanoq iliorsimanerat isertorlutillu sunniiniarsimanerat pillugu, DR allaaserinnereertorlu nunanut allanut ministerip Lars Løkke Rasmussenip (M) amerikamiut aallartitaat oqaloqatiginiarlugu qaaqquaa.

Nunanut allanut ministereqarfik Ritzauimut pingasunngornermi ilisimatitsivoq.

- Nunanit allanit Kalaallit Nunaat Kunngeqarfimmilu inissisimaffia soqutigineqartuarnera nalunngilarput, taamaattumik piffissami aggersumi nunanit allanit Kunngeqarfiup siunissaanik sunniiniarnerit naammattoortarnissaat aamma tupaallaatigissanngilarput.

- Kunngeqarfiup iluani suliassanut akuliunniarnerit suulluunniit soorunami akuerineqarsinnaanngillat. Tamanna eqqarsaatigalugu nunanut allanut ministeriaqarfik qinnuigaara amerikamiut aallartitaat oqaloqatiginiarlugu aggersaqqullugu, Lars Løkke Rasmussen Ritzauimut allakkatigut nalunaaruteqarpoq.

Nunanut allanut ministeriaqarfiup USA-llu Danmarkimi aallartitaata pingasunngornermi kingusinnerusukkut oqaloqatigiinnissaat naatsorsuutigigini Lars Løkke Rasmussen Aalborgimi tusagassiortunik katersortitsinermi oqarpoq.

Sunniiniarnerit pisortatigoortumik peqataaffigineqarpata, kingueqartinneqarpata imaluunniit iliuuseqarfigineqarpata nunat tamalaat akornanni malittarisassanut unioqqutitsinerunerat danskit tungaanniit USA-mut erseqqissaatigineqassasut, Løkke oqarpoq.

DR: Angutit Trumpimut attuumassuteqartut Kalaallit Nunaannut isertorlutik sunniiniarsaripput

Mark Stroh USA-p Danmarkimi aallartitaagallartutut atuuffeqarpoq. Alan Leventhal januaarimi aallartitaajunnaarmat USA Danmarkimi aallartitaaruppoq.

Aallartitaagallartoq tassaavoq qaffasissumik atorfilittaq, aallartitap atuuffianit annikinnerusumik inissisimasoq.

Donald Trumpip Ken Howery Danmarkimi aallartitassatut toqqarpaa, Howeryli politikkikkut suli akuerineqannginnami aallartitatut suli atuutilinngilaq.

DR-ip tusarfiit kinaassutsiminnik isertuussisut atorlugit, angutit USA-p præsidentianut Donald Trumpimut attuumassuteqartut Kalaallit Nunaannut isertortumik sunniiniarsarinerat pillugit allaaserisaq pingasunngormat saqqummersippaa. Donald Trumpip Kalaallit Nunaat USA-mut ilanngunnissaa sivisuumik kissaatigaa.

Angutit namminneq sulinersut DR-ip paasinngilaa.

Amerikamiut naalakkersuisui Amerikamiut Kalaallit Nunaanni sunniiniaqqullugit peqqusimaneraat DR-ip Præsidentip illorsua aperaa.

DR-illi apeqqutini akissutisinngilai.

Aaja Chemnitz: Killissamik qaangiineruvoq

Amerikamiut naalakkersuisuisa innuttaasut ataasiakkaat iliuusaat aqussinnaanngikkaat, Amerikamiullu ataasiakkaat Kalaallit Nunaanni soqutigisaqarsinnaasut, Amerikamiut Københavnimi aallartitaqarfiat DR-imut allappoq.

USA-mut ersarissumik nalunaaruteqarnissaq pingaaruteqartoq, Folketingimut ilaasortaq Aaja Chemnitz (IA) isumaqarpoq.

- Pisoq tupaallannanngilaq, nalunngilarpummi Amerikamiut soqutiginnittorujussuunerat. Kalaallit Nunaanni qinersisoqarnerani kingullermi sunniiniarnerit aamma takuagut.

- Pingaaruteqarporli oqaatigissallugu killissanik qaangiisoqarnera. Kalaallit Nunaata sanngitsuumik inissisimaffiisa annikillisinnissaat siunertaralugu sapinngisamik iliuuseqartoqarnissaa aamma pingaaruteqarpoq, oqarpoq.

Danmarkip nunat iligisat aallartitaannik oqaloqateqarniarluni qaaqqusisarnerai qaqutigoortuuvoq.

Lars Løkke Rasmussenilli nunanut allanut ministeriaqarfik maajip qaammataani peqquaa, USA-mit taamani aallartitaagallartoq Jennifer Hall Godfrey nunanut allanut ministeriaqarfimmi pisortamut Jeppe Tranholm-Mikkelsen oqaloqateqaqqullugu.

USA Kalaallit Nunaanni kilitsissiaqarnerulerniarnera Amerikamiut tusagassiuutaata Wall Street Journalip kinaassutsiminik isertuussisoq aqqutigalugu allaaserinninnerata kingorna taama pisoqarpoq.

Danmarkip Kalaallit Nunaatalu akornanni qanimut attaveqatigiittoqartoq Lars Løkke Rasmussenip erseqqissarpaa.

- Danmarkimi Kalaallit Nunaannilu naalakkersuisut tatigeqatigiillutik qanimut suleqatigiipput, soorluttaaq Kalaallit Nunaanni Danmarkimilu oqartussaasut attuumassuteqartut qanimut suleqatigiillutik oqaloqatigiittut, oqarpoq.

/ritzau/