Ukiaanerani sulinngiffeqarnermi angalaneq 100.000 koruuneqartoq

Aasaanerani sulinngiffeqarnermi Ilulissaniit Danmarkimut angalanermut akit Nuummi mittarfissuup ammarnerata kingorna sisamariaatinngorsimapput. Tamanna Iluliarmiut ilaasa aasaanerani sulinngiffeqarnerminni Danmarkimi ilaquttaminnut tikeraarnissaraluaminnik taamaatitsiinnarnerannik kinguneqartoq, Sermitsiami sapaatip akunnerata siuliani saqqummersumi oqaluttuaraarput.

Ilaqutariittut Avannaani illoqarfinniit Danmarkimut ukiaanerani sulinngiffeqarnerup nalaani timmisartorluni angalaneq qanoq akeqarnersoq, sapaatip akunnerani matumani misissorparput.

Tassa Danmarkimi aanaakkunnut aataakkunnullu tikeraarniarluni ukiaanerani atuanngiffeqarnerup nalaani tassa sapaatip akunnerani 42-mi timmisartorluni angalaneq Avannaani ilaqutariinnut inuusukaanut marlunnik aqqaneq-marluliisimanngitsunik meerartalinnut qanoq akeqarnersoq misissorniarlugu aalajangerpugut.

Isumaqaratta assersuutissaqqittoq taamaaliorpugut, utoqqaammi soraarnerussutisiaqarnerujumallutik – inissarsiniarnerlu ajornannginneroqimmat - nunatsinniit Danmarkimut noorartut amerliartuinnarmata.

Ilaqutariippassuillu qularnanngitsumik isumaqarput, aanaakkut aataakkullu Danmarkimi najugaqaraluarpataluunniit, ernutaasut taakkununnga tikeraarnissamut periarfissaqartuaannartariaqartut – soorlu ilaqutariit iluanni akunnaalliliisoqassatillugu allatigulluunniit nalliuttorsiortoqassatillugu.

Nuannaariarneq akisusoq

Taamatut feeriarneq tassa akisulluni inornartorujussuusinnaavoq – ingammik Qaanaami najugaqaraanni. Danmarkimummi utimullu timmisartorluni angalaneq Qaanaami ilaqutariinnut marlunnik meerartalinnut 96.542 koruuneqarpoq. Tamatuma saniatigut unnuinerit – aallarnermi Nuummi unnuineq ataaseq, angerlarnermilu Ilulissani unnuineq ataaseq, tassa ilaquttanut tikeraarneq minnerpaamik 100.000 koruuneqarpoq.

Kujasinnerusumiit tassa Upernavimmiit Danmarkimut timmisartorluni angalaneq “affaannarmik” akeqarpoq, tassa “taamaallaat” ”kun” 48.710 koruuneqarpoq. Aappariinnulli SIK-mik ilaasortatut akissaatiliusunut suli inornarluinnarpoq. Uummannamiit Qaarsut aqqusaarlugit angalanermut bilitsit aamma akisupput, tassa 59.146 koruuneqarput.

Akit allaatigisami uani saqqummiussavut tamarmik Takuss bilitsiupput tassaasut amerlassutsimikkut killilikkat – aamma utertinneqarsinnaanatillu allanngortinneqarsinnaanngitsut.

”Takuss bilitsi aallarfissani aalajangersimasuni pisiassaavoq periarfissanilu akikinnerpaalluni, aamma pilersaarusioreerluni angalasussamut siusissukkullu bilitsimik pisinissamut periarfissalimmut tulluartuuvoq. Takuss bilitsi allanngortinneqarsinnaanngilaq, utertinneqarsinnaanngilaq akisunermullu nuunneqarsinnaanani”. Air Greenland nittartakkamini taama allappoq.

Akit allanngorartuartut

Air Greenlandip timmisartornermut nittartakkamini akigititai erniinnaq pisiarinngikkaanni ilumut atuunnersut aamma qularnartarpoq. Air Greenlandimmi akit allanngorartuartut atuutilersimmagilli nunatsinnut nunatsinniillu timmisartuussinermut akigititai inuinnarnit paasiuminaatsinneqartarput.

Timmisartornermummi bilitsit akii piumaneqarnerat aallaavigalugit allanngorartuartuupput. Ilaasorpassuassaqassatillugu akisunerusarput – ilaasussakitsillugulu akikinnerusarlutik. Bilitsit akii qarasaasiatigut atortorissaarutinit nutaalianit aqunneqartarput, atuisullu timmisartumut aalajangersimasumut ilaanissamut ingerlaannaq bilitsersinatik akinilli apeqqutiginninnerinnaat bilitsit akitsornerannut pissutaaqataasinnaasarpoq.

Akit allanngorartuarnerat timmisartuutileqatigiiffiit qularnanngitsumik iluaqutigingaatsiartarpaat, timmisartummi akisuut atorluarneqarnissaannut qulakkeerutaasarmata.

Taamatut aaqqissuussaanerat ullormi aalajangersimasuunngitsumi timmisartorniartunut pitsaasuusinnaavoq. Ikittuinnaalli taamaaliornissamut periarfissaqartarput. Amerlanerimmi timmisartumik angalanissartik ullut sulinngiffeqarfissat, ullut atuanngiffissat assigisaallu aallaavigalugit pilersaarusiortarpaat.

Air Greenlandilli allanngorartuartunik akigititaqartarnini attatiinnarniaraa, Sermitsiami sapaatip akunnerata siuliani saqqummersumi oqaluttuaraarput.

Avannaanilu pissutsit Ilulissani mittarfissuassaq ammareeriarpat allanngorsinnaasut timmisartuutileqatigiiffimmit aamma oqaatigineqartoq, allaatigisami tassani aamma oqaluttuaraarput.

- Kalaallit Nunaannut Kalaallit Nunaanniillu sapaatip akunneranut marloriarluta timmisartuussisarnissaq pilersaarutigaarput. Angallassisarnissaq nalilersortuarneqarlunilu niuerfimmi piumaneqarneq naapertorlugu naleqqussarneqartassaaq, Air Greenland allappoq.

Akinik misissuinermi paasisat: Ilaqutariittut Danmarkimut ukiaanerani feeriarneq

Illoqarfik aallarfissaq - Ullut aallarfissat - Akit

Qaanaaq - 7/10 – 27/10 - 96.542 *

Upernavik - 7/10 - 24/10 - 48.710

Uummannaq - 10/10 – 26/10 - 59.146

Qeqertarsuaq - Qulimiguulimmik angalassiffiuneq ajorpoq

Aasiaat - 10/10 – 24/10 - 36.686

Ilulissat - 7/10 – 24/10 - 31.668

Nuuk - 7/10 – 24/10 - 28.370

* Ilulissani Nuummilu unnuinerit ilanngunnagit

Ima iliorpugut

Danmarkimut ukiaanerani atuanngiffeqarnerup nalaani tassa sapaatip akunnerani 42-mi timmisartorluni angalaneq ilaqutariinnut marlunnik aqqaneq-marluliisimanngitsunik meerartalinnut qanoq akeqarnersoq, Air Greenlandip timmisartuussinermut akigititaanik nittartagaani 2025-mi ataasinngornermi aggustip 26-ani misissuinitsinni paasiniarparput. Akit misissukkavut tamarmik toqqagassani akikinnerpaajupput – tassa Takuss bilitsiupput allanngortinneqarsinnaanngitsut.