Ukiukkut qaqutigoortoq: Nuup eqqaani sikualoqaqisoq
Nuup kangerlua piffissami kingullermi sikualoqangaatsiarpoq. Assit allaaserisami takullugillu Pinngortitaleriffimmit nassuiaat atuaruk.
Ukiukkut sikup taama siusitsigisumik kaanngartarnera kangerlummilu taama sukkatigisumik ingerlaarnera qaqutigoortoq Pinngortitaleriffimmit oqaatigineqarpoq.
Assiliisoq: Oscar Scott Carl
Nuup eqqaani kangerlummi sikualoqartarnera nalinginnaavoq, piffissamili matumani ima sikualoqangaatsiarpoq. Tamanna Pinngortitaleriffiup ukiukkut qaqutigoortumik pisartutut taavaa.
– Sikup annersaa upernaakkut kaanngaraangami kangerluummiiginnartartoq takukulaneruvarput, sermillu amerlanerpaartaat Nuup Kangerluata paavanut Nuup avataanut pitinnatik aareersimasarput. Taamaattumik Nuummi sermeq takorpiarneq ajorparput, ilisimatusartuuneq John Mortensen oqarpoq.
Maannali aallaaneruvoq.
Assiliisoq: Oscar Scott Carl
Sikut amerlaqisut Narsap Sermianeersuupput, tassanngaanniit sermip imaanut aniaffii pingasuupput. Nuup avannaata kangiani kangerluummiippoq.
– Februaarimi suna tamarmi aallartisarsimavoq, sikkuat 60 km2 it Narsap Sermianiit kaanngarmata. Silalu manngullunilu anorersuariarami sikkusak kaanngartujussuarsimasoq, pinngortitaleriffik paasissutissiivoq.
SIUNISSAMUT AARLERISAARUT?
Narsap Sermia Pinngortitaleriffimmiit ilisimatusarnikkut suliniutitigut arlalitsigut malinnaaffigineqarluartuuvoq. Narsap Sermiata nakkaaffia 2010-miit kilometererpassuanik ilummukarsimagami.
Narsap Sermia 2004-miit 2023-mut pingasoriarluni 7,6 kilometerinik tunuarpoq. Sermillu nakkaaffia maannakkut qattunersamiilersimavoq, nalimmassarfigisinnaasaanik.
Silap Pissusiata Ilisimatusarfiup misissuisimanera naapertorlugu qattunertaq taanna ilummut qaangissaguniuk taava sermeq annertooq 30 kilometerinik takitigisumi itisoorsuarmilu kaanngartalertussaassaaq.
Silap Pissusiata Ilisimatusarfiup paasissutissaataanit tigusat
Sermeqarfiup saavani sikkusaqartarnera nalinginnaanerusarpoq, taakkualumi kaanngarlutik kangerlummi siaruaattarlutik.
– Ukiuni kingullerni qulini Narsap Sermiata anianera aamma sukkatsissimarpasippoq, kangerlummi iluliarasaat sikkusallu siaruaassimasut annertunerulernikuugamik, John Mortensen nassuiaavoq.
Assiliisoq: Oscar Scott Carl
Sikualoqarujussuarnera imaani angallannermut aamma ajornartorsiortitsivoq. Politiit angallataat Sisak ataasinngormat ikiuiniarluni angallatinut arlalinnut ingerlariaqqissinnaanngitsunut orniguppoq.
DMI-p sikusiornermut kiffartuussivia inuit Facebookikkut malinnaaffigisinnaasaannik qaammataasamiit assilisanik aamma ikkussuiuarpoq.
Assiliisoq: Oscar Scott Carl
