Ukiuunerani allagartartaartut Ilisimatusarfimmi nalliuttorsiutigineqartut

Ilinniarnerminnik naammassisut 38-t Ilisimatusarfimmi allagartartaarnerat tallimanngormat nalliuttorsiutigineqarpoq.

Ilisimatusarfimmi februaarip 28-ani nuannaartoqarlunilu persuarsiortoqarpoq.

Assi: Emil Stach

Morten Okkels Journalist

Saqqummersinneqarpoq 2. Marsi 2025 - 15:11

Annonse

Ilisimatusarfimmi ukiuunerani allagartartaartitsinermi bacheloritut allagartartaartut 28-upput, kandidatitut allagartartaartut arfineq-marluk masteritullu allagartartaartut pingasuullutik. Soorunami tallimanngornermi ullormi allagartartaarfiusumi persuarsiutigineqarput.

– Ullormi tassani persuarsiorpalaartunik oqalugiartoqarpoq, kiinnat nuannaartut takussaapput ilinniartullu pikkorissut ersartaanneqarluarlutik, taakkuami ilinniakkatik suliumatussuseqarlutik tunniusimalluarlutillu naammassivaat, Ilisimatusarfik nittartakkamini allappoq.

– Soraarummeerlutik allagartartaartuutivut tamaasa pilluaqquagut - ingerlariaqqinnerannilu pitsaanerpaanik tamanik kissaappagut. Ilinniarnissinni ilaasinnaasimagatta tulluusimaarutigaarput!